ДАШТ-ий хүрэл медальт Б.Чинзориг Азийн Наадмын 63 кг-д медалийн төлөөх тулаанаа Казахстаны боксчин Ертуган Жэйнуллиновтой хийж, оноогоор ялснаар медалийн болзлоо хангалаа.Медалийн өнгөө шийдэх, "Парис 2024" Олимпын эрхээ авах хариуцлагатай даваанд өнгөрсөн оны тивийн аварга Тайландын Бунжонг Синсиритэй тулалдана.
Тулааны дараа тэрээр сэтгэгдлээ сэтгүүлчдэд хуваалцсан байна. Б.Чинзориг "Медалийн төлөөх тоглолтод ялалт байгуулсандаа баяртай байна. Гурав тулалдаж медальд хүрлээ дахиад хоёр тулаан үлдлээ. Эхний хоёр үе сайхан өөрийнхөөрөө тоглосон бол гуравдугаар үед өрсөлдөгч маань амаргүй байлаа. Дэлхийд ранкаараа тэргүүлдэг Узбекстан Казахстан гээд хүчтэй өрсөлдөгч нар орсон зоонд орсон. Дараагийн учраа Тайландтай даагаа нэхэх тулаан хийнэ. Өмнө нь тоглоод шүүгчийн эргэлзээтэй шийдвэрээр ялагдсан гэж би үздэг юм" гэв.
