ОУВС: Ойрын жилүүдэд инфляц эрчимжиж, эдийн засгийн өсөлт сул байх төлөвтэй.
Евро бүсийн эдийн засгийн тогтвортой байдлыг хангаж, мөнгөний бодлого боловсруулахад уур амьсгалын өөрчлөлт, байгалийн гамшиг, эрчим хүчний шилжилт хүндрэл учруулахыг Европын Төв банкны тайланд онцлоод байна. Эдгээр сорилтууд ойрын хэдэн арван жилд үргэлжлэхээр байгааг Европын Төв банкны Ахлах эдийн засагч Майлс Паркер анхаарууллаа.
Олон Улсын Валютын Сангийн тооцоолсноор ойрын 10 жилд инфляц эрчимжиж, эдийн засгийн өсөлт доогуур түвшинд хадгалагдах төлөвтэй байна.
Энэ сард Европын Төв банк бодлогын хүүгээ 10 дахь удаагаа өсгөөд байгаа юм. Өөрөөр хэлбэл тус банк өнгөрсөн оны 11 дүгээр сараас хойш бодлогын хүүг 450 суурь нэгжээр нэмэгдүүлээд байна.
ОХУ-Украины дайн ногоон шилжилтийн үйл явцыг улам түргэсгэж буйг Европын Комиссын төлөөлөгч Хан Грин онцолж байна.
Европын Комиссын төлөөлөгч Хан Грин
“Энэ бол бидний давах ёстой сорилт л доо. Европын комисс байгуулагдсан цагаасаа хойш л энэ асуудлыг хөндөж байна. Ногоон шилжилт бол дижитал шилжилтээс гадна бидний анхаарлаа хандуулж буй гол чиглэл. Харин Украины дайн гарснаар ногоон шилжилтийг улам түргэсгэж байна.
Европын Комисс болон гишүүн орнууд төсвийнхөө доод тал нь гуравны нэгийг ногоон шилжилтэд зориулах зорилт тавин ажиллаж байгаа. Ингэснээр эрчим хүчний хараат байдал буурч, төрөл зүйл нь нэмэгдэнэ. Энэ нь эцэстээ эрчим хүчний үнэд ч нөлөөлөх юм.
Дэлхийн томоохон гүрнүүд бидэнтэй адил уур амьсгалын өөрчлөлтийн эсрэг тэмцэж, хөрөнгө оруулалт хийж байгаад бид баяртай байгаа. Үүнийг бид хэдэн жилийн өмнө хийсэн. Харин одоо АНУ бидний замналаар явж байгаад бид баяртай байна. Харин инфляцыг бууруулах хуульд сайнгүй хэдэн заалт байгаа юм.
Эдгээр хориг хамгаалалтын чанартай заалтууд чөлөөт худалдаа, чөлөөт худалдааны гэрээ, бараа таваар, үйлчилгээний солилцоонд тодорхой сөрөг нөлөөтэй байгаа. Гэхдээ бид энэ асуудлыг шийдвэрлэхээр ажиллаж байна. Эцэст нь Европт ч АНУ болон дэлхийн бусад улсуудад ч үр өгөөжтэй шийдэлд хүрч чадна гэдэгт би итгэлтэй байна” гэж мэдэгдлээ.
