ТХЯ-ны Төрийн захиргаа, удирдлагын газрын даргаар ажиллаж байхдаа хүний амь хөнөөсөн хэргээр 11 жилийн ял авсан Б.Махбал 7 жил 10 сар 14 хоног шоронд суугаад суллагдсан тухай бид мэдээлсэн.
- Биеэр эдэлсэн ял 5 жил 1 сар 3 хоног
- Шагналын 9 сар 20 хоног
- Ерөнхийлөгчийн уучлалаар 1 жил 11 сар 21 хоног
Ингээд 7 жил 10 сар 14 хоног болж, цаана нь үлдсэн 3 жил 1 сар 16 хоногийн эдлээгүй үлдсэн ялаас хугацаанаас өмнө сулласан байна.
Түүний эдлэх ёстой ялаас Ерөнхийлөгчийн үзүүлсэн уучлал сонирхол татаж буй. Тэгвэл экс Ерөнхийлөгч Х.Баттулга суудлаасаа буухаасаа өмнөхөн 210 дугаар зарлигаар нийт ялынх 25 хувьд нь уучлал үзүүлсэн байна.
Бүр тодруулбал, 2021 оны зургаадугаар сарын 25-ны өдөр шинэ Ерөнхийлөгч У.Хүрэлсүх тангарагаа өргөсөн бөгөөд 24-нд экс Ерөнхийлөгч Х.Баттулга уучлалын зарлиг гаргасан аж.
Ингэснээр Ерөнхийлөгч асан Х.Баттулгын 13 хүнд уучлал үзүүлсний нэг нь Б.Махбал юм.
Эрүүгийн хуулийн 74-р зүйл Эрүүгийн байцаан шийтгэх хуулийн 334-р зүйл:
Эрүүгийн хуулийн 74, 76 дугаар зүйлд зааснаар ялтныг хорих ял эдлэхээс хугацааны өмнө тэнсэн суллах, ялаас чөлөөлөх тухай асуудлыг шүүхийн шийдвэр гүйцэтгэх байгууллагын тодорхойлолтыг үндэслэн гаргасан прокурорын дүгнэлтийн дагуу шүүхийн шийдвэр гүйцэтгэх байгууллагын оршин байгаа газрын шүүхийн шүүгч захирамж гаргаж шийдвэрлэнэ.
Ял эдэлж буй ялтнуудыг хуульд заасан хугацааныхаа зохих хувийг биеэр эдэлсэн бол шүүх магадланд оруулж үлдсэн ялыг нь тэнсэн харгалзах ялаар сольдог зохицуулалтад үндэслэн, өмгөөлөгч нь суллах хүсэлт гаргаад байсан аж.
Улмаар Багануур дүүргийн шүүхээс Шүүхийн шийдвэр гүйцэтгэх тухай хуулийн 187.2.1 зүйлд зааснаар: байнга оршин суух газраа очсоноос хойш ажлын 3 өдрийн дотор нутаг дэвсгэрийн шүүхийн шийдвэр гүйцэтгэх газар, хэлтэст мэдэгдэх; үүрэгтэйг Н.Махбалд мэдэгджээ.
2017 оны сүүлээр ЗТХЯ-ны Төрийн захиргааны удирдлагын газрын даргаар томилогдоход тухайн үед шинэхэн Ерөнхийлөгч болоод байсан Х.Баттулга нөлөөлж, албан тушаалд нь томилуулсан гэдэг мэдээлэл тухайн үед улстөрийн хөшигний ард хөвөрч байв.
