ЗТХЯ-ны Төрийн захиргаа, удирдлагын газрын даргаар ажиллаж байсан Б.Махбал нь яамныхаа Хяналт, шинжилгээ, үнэлгээ, дотоод аудитын газрын дарга Г-гийн амь насыг хөнөөсөн хэргээр 13 жилийн ял авч, давж заалдан 11 болгон бууруулснаар ялаа эдэлж байв. Тэгвэл түүнийг өчигдөр орой хугацаанаас нь 3 жил, 6 сар, 1 хоногийн өмнө магадлангаар сулласан талаар бид мэдээлсэн.
Б.Махбалын хувьд биеэр 5 жил 1 сар 3 хоногийн хорих ял эдэлж, “шагналын” 9 сар 20 хоног, Ерөнхийлөгчийн зарлигаар уучлал үзүүлсэн 1 жил 11 сар 21 хоног гээд бүгд 7 жил 10 сар 14 хоногийн ял эдэлж 3 жил 1 сар 16 хоногийн ял эдлээгүй үлдсэн байна. Иймд эдлээгүй үлдсэн ялаас хугацаанаас өмнө суллах шийдвэрийг шүүх гаргажээ.
Шүүгчийн захирамжид дурдсанаар Монгол Улсын Ерөнхийлөгчийн 2021 оны 6 дугаар сарын 24-ний өдрийн 210 дугаартай зарлигаар Б.Махбалын эдлээгүй үлдсэн хорих ялын 25 хувь буюу 1 жил 11 сар 21 хоногийг уучилжээ. Ерөнхийлөгчийн 2021 оны сонгуульд ялсан У.Хүрэлсүх нь 2021 оны 6 дугаар сарын 25-нд Ерөнхийлөгчийн тангараг өргөсөн байдаг. Тэгэхээр өмнөх өдөр нь Х.Баттулга бүрэн эрхийнхээ хүрээнд зарлиг гарган Б.Махбалд уучлал үзүүлжээ.