Өчигдөр буюу 2023 оны есдүгээр сарын 26-ны өдөр Баянзүрх дүүргийн 8 дугаар хороонд байрлах нэгэн айлд 33 настай, эмэгтэй бага насны гурван хүүхдийн хамт нэг дор дөрвөн хүн угаартсан байдалтай амь насаа алдсан харамсалтай хэрэг бүртгэгджээ.
Нийслэлчүүд өвлийн улиралд утаагаар амьсгалж, угаарын хийнд хордсон дуудлага мэдээлэлд дарагддаг. Хэдийгээр урин дулааны улирал үргэлжилж, намар болсон ч угаарын хийнд хордож, бүр цаашилбал нас барах тохиолдол ч арилсангүй.
Энэ оны эхний хагас жилийн байдлаар авч үзвэл 1739 хүн сайжруулсан гэх нэртэй шахмал түлшний угаарт хордсоноос 407 нь бага насны хүүхдүүд байсан. 46 хүн угаарын хийнд хордож цаг бусаар хорвоог орхижээ. Хамгийн харамсалтай нь энэ тоо цаашдаа ч өснө. Оны төгсгөлд хэд болохыг таашгүй юм.
Нийслэлийн төсвөөс жил бүр татвар төлөгчдийн мөнгөнөөс утаагүй түлшний хэрэглээ, гэр хорооллыг барилгажуулахад маш өндөр төсөв баталдаг. Үүний нэг жишээ нь өнгөрсөн жил энэхүү ажилд 39.4 тэрбум төгрөгийг зарцуулжээ.
Улаанбаатарын утааг бууруулах хамгийн үр дүнтэй шийдэл гэж энэхүү шахмал түлшийг сонгосон ч түүнийг дагаад утаагүй түлшинд хордож нас барах иргэдийн тоо нэмэгдсээр байна. Өнөөдөр айл өрхүүд утаагүй түлшний асуудлаас болж хагацал үзсэн хэвээр. Үүнд хэн хариуцлага хүлээх вэ?
Н.Дөл
