“Ханжоу 2023” буюу 19 дэх удаагийн Азийн наадам дөрөв дэх өдрөө үргэлжилж байна. Тэгвэл есдүгээр сарын 26-ны байдлаар Монгол Улс хоёр мөнгө, дөрвөн хүрэл, нийт зургаан медальтайгаар 50 орны тамирчдаас 17-д бичигдлээ.
Манай улсын хувьд наадмын гурав дахь өдөр 3х3 сагсанбөмбөг, бокс, туялзуур сэлэм, жүдо, буудлага, скуаш теннис, усанд сэлэлт, таеквондо, теннисийн төрлөөр өрсөлдсөн.
Жүдо
Манай улсын хамгийн ихээр найдлага тавьдаг спортын төрөл бол жүдо бөх байдаг. Тэгвэл өчигдөр үдээс хойших медалийн барилдаанд -100 кг, -78кг, +78, -90 кг-д нийт дөрвөн тамирчин үлдээд байсан билээ. Тэгвэл -90 кг-д барилдсан Г.Алтанбагана Ливаны жүдоч Сагапов Карамноб-д, -78кг-д барилдсан ОУХМ О.Хүслэн Узбекистаны бөхөд ялагдаж тэмцээнээ өндөрлүүлээ.
Харин +78 кг-д барилдсан ОУХМ А.Адъяасүрэн Энэтхэгийн жүдоч Маан Туликаныг ялснаар хүрэл медалийн эзэн болсон бол -100 кг-ын жинд Б.Гончигсүрэн алтан медалийн төлөө Узбекистаны жүдоч Туробоев Музаффарбектэй барилдаж иппон үнэлгээгээр ялагдан мөнгөн медаль хүртэж Монголын баг тамирчдын медалийн тоог хоёроор нэмлээ.
3х3 сагсанбөмбөг
Сүүлийн жилүүдэд эрчимтэй хөгжиж буй 3х3 сагсанбөмбөгийн төрөлд оролцож буй Монгол Улсын U23 насны эрэгтэй шигшээ баг хэсгийн эхний тоглолтоо өчигдөр хийлээ. Йорданы шигшээ баг учраа таарсан манай баг нэлээд ойрхон тоглолтыг үзүүлж, үндсэн цагт 17-13-ын харьцаатай ялалт байгуулав. Эхний ялалтаа авсан эрэгтэй шигшээ багийн тухайд өнөөдөр 13:00 цагаас Тайваний эсрэг хэсгийн хоёр дахь тоглолтоо хийх юм.
Сагсанбөмбөг
Монголын сагсанбөмбөгийн эрэгтэй шигшээ баг хэсгийн эхний тоглолтоо БНХАУ-ын багтай хийж 50:89 оноогоор хожигдол хүлээсэн. Тоглолтын тухайд эхний хагаст онооны харьцаа болон тоглолтын агуулга ойрхон байсан хэдий ч хоёрдугаар хагаст оноо хоёр оронтой тоонд хүрч, аажмаар холдсоор нийт 39 онооны зөрүүтэй ялагдлыг амслаа. Ийнхүү хожигдох болсон нэг шалтгаан нь тамирчдын нурууны өндөр гэхэд хилсдэхгүй юм. Мөн баг тамирчдын хувьд ялагдсан ч эзэн улсын эсрэг 30 орчим онооны зөрүүтэй хожигдох шаардлагатай байсан ч БНХАУ-ын тамирчид боломж олгосонгүй. Яагаад 40 онооны дотор хожигдох ёстой вэ. Учир нь, манай улс БНХАУ-тай таарч, тоглож байсан өмнөх тоглолтуудад +40 оноогоор хожигдож байсантай холбоотой юм.
Бокс
Нийтдээ 38 орны 238 тамирчин өрсөлдөж байгаа боксын төрлийн гурав дахь өдөр манай улсын хоёр тамирчин ялалт байгууллаа. Тухайлбал, эрэгтэйчүүдийн 57 кг-ын жинд Г.Лундаа Йемен улсын боксчинг ялсан бол +92 кг-д Х.Бекнур Непалын боксчинтой тулалдаж Азийн наадмын эхний ялалтаа авсан юм.
Буудлага
Эмэгтэйчүүдийн 25 метрийн гар бууны тогтоол буудлагад нийт 44 тамирчин өрсөлдөж Энэтхэгийн тамирчид тэргүүлсэн. Харин манай тамирчдын хувьд ОУХМ Т.Баярцэцэг тогтоол буудлагад 286 оноотойгоор 20-т, Т.Баярцэцэг 283 оноогоор 31-т, Хөдөлмөрийн баатар О.Гүндэгмаа гурван сетэд 93, 90, 87 авснаар 41-т эрэмбэлэгдлээ. Түүнчлэн, эмэгтэйчүүдийн 25 метрийн гар бууны хурдан буудлагын дасгал өнөөдөр 09:00 цагт эхэлнэ. Тамирчид хурдан буудлагын дасгалд гурван сетэд 30 сум буудах бөгөөд хоёр дасгалын нийлбэр дүнгээр шилдэг найман тамирчин шигшээ өрсөлдөөнд шалгарах юм.
Ийнхүү 19 дэх удаагийн Азийн наадмын дөрөв дэх өдөр буюу өнөөдөр манай улсын баг тамирчид 3х3, сагсанбөмбөг, бокс, туялзуур сэлэм, жүдо, буудлага, скуаш теннис, ширээний теннис, усанд сэлэлт, таеквондо, гандбол, шатар, гоо даам гэсэн төрлөөр авхаалж самбаа, хурд хүч, онч мэргэнээ үзэх юм.
