Есдүгээр сарын 25-ны өдрийн байдлаар Шивээхүрэн-Сэхэ боомтоор 217 мянган тонн ачаа, 3127 автомашин гарчээ
Монгол Улс, БНХАУ-ын хилийн Шивээхүрэн-Сэхэ боомтын нийт ачаа тээврийн хэмжээ 2023 он гарсаар 12 сая тонн давсныг Сэхэ боомтын захиргаа мэдэгдлээ. Тус боомтын нийт ачаа эргэлт 984 сая ам.доллар хүрсэн байна. Энэ он гарсаар Шивээхүрэн-Сэхэ боомтоор нийт 188 мянга орчим автомашин хил нэвтэрчээ.
Есдүгээр сарын 25-ны буюу даваа гарагийн байдлаар тус боомтоор 217 мянган тонн ачаа, 3127 автомашин гарсан байна. Дээрх хоёр үзүүлэлт аль аль нь тус боомтын хувьд түүхэн дээд үзүүлэлт болж байгаа аж.
Энэ онд тус боомтоор нүүрс тээврийг нэмэгдүүлэхээр гаалийн шалгалтыг хурдасгах, логистикийг сайжруулах арга хэмжээнүүд аваад байгаа юм.
Монгол Улсын уул уурхайн салбарын гол бүтээгдэхүүн болох зэс, нүүрсний экспортын 25 орчим хувийг Шивээхүрэн боомтоор гаргадаг.
Шивээхүрэн боомтыг Сэхэ боомттой 7.1 км төмөр замаар холбох бүтээн байгуулалт хийгдэж байгаа бөгөөд хил дамнасан боомтын төмөр зам ашиглалтад орсноор тус боомтын экспортын нэвтрэх хүчин чадал хоёр дахин нэмэгдэж, ачаа тээвэр 20 сая тонн хүрэх боломжтой болох юм.
Ингэснээр тус бүс нутгаас олборлодог нүүрсийг зах зээлийн чөлөөт өрсөлдөөнд тулгуурлан цаг хугацаа, өртөг зардал хэмнэж, экспортын гол зах зээл рүү тээвэрлэх боломж бүрдэхээс гадна говийн бүс нутагт буй ашигт малтмалын ордуудын үнэлэмжийг өсгөж, эдийн засгийн эргэлтэд оруулах шинэ боломжууд нээгдэнэ.
