ОХУ-ын чөлөөт бөхийн мэргэжлийн лиг буюу Иван Поддубныйгийн нэрэмжит лиг өнөөдөр ОХУ-ын нийслэл Москвагийн хөлбөмбөгийн ЦСКА клубийн талбайд эхэллээ. Эрэгтэй, эмэгтэй чөлөөт бөх, сонгомол барилдаан, грепплинг, панкратионы гэсэн таван төрөл 18 дэвжээн дээр нэгэн зэрэг зохион байгуулагдаж байгаа юм. Манай улсаас эрэгтэй дөрөв, эмэгтэй 11 тамирчин, гавьяат тамирчин Ц.Цогтбаяр, гавьяат дасгалжуулагч Б.Баттулгын удирдлага дор ОХУ-ын Буриадын “Зугалай” багийн нэрийн өмнөөс оролцож байна. Эрэгтэйчүүдийн 65 кг-ын жинд ОУХМ Төмөр-Очирын Тулга, 125 кг-ын жинд ОУХМ Мөнхтөрийн Лхагвагэрэл эмэгтэйчүүдийн 53 кг-д ОУХМ Бат-Очирын Болортуяа, 68 кг-д ОУХМ Зоригтын Болортунгалаг, 76 кг-д ОУХМ Ганбатын Ариунжаргал нар өнөөдөр алтан медалийн төлөө тус тус барилдана. Харин бүх төрлийн хүрэл медалийн эзэд өчигдөр тодорсон юм.