Монголын багш нарын үйлдвэрчний эвлэлээс багш нарын цалинг 1000 ам. долларт хүргэхийг шаардаж, аравдугаар сарын 5-аас ажил хаялт зарлахаа мэдэгдсэн. Тэгвэл уг асуудалтай холбоотойгоор Боловсрол, шинжлэх ухааны сайд Л.Энх-Амгалан тайлбар өглөө.
Тэрээр, "Монголын багш нарын үйлдвэрчний эвлэл бол төрийн бус байгууллага. Засгийн газартай хэлэлцээрт ордог байгууллага биш. Хэн нэгэн төрийн бус байгууллага гарч ирээд хууль бусаар ажил хаялтад уриалж болохгүй. Энэ бол хууль зөрчсөн зүйл гэж ойлгож байгаа.
Есдүгээр сарын 1-нд багш нарын авч хэрэгжүүлэх цогц Засгийн газрын тогтоол гарсан. Тогтоолын хүрээнд өнөөдөр бид багш нарынхаа үнэлгээг хоёр дахь удаа зарлах гэж байна. Гүйцэтгэл, үр дүнд суурилсан санхүүжилтэд шилжээд хоёр дахь жилдээ орж байна. Тэгэхээр хамгийн сайн багш хамгийн сайн цалинг авах ёстой биз дээ.
Багш нарын цалин төрийн үйлчилгээний алба хаагчдын хамгийн дээд зэрэглэлд хүрсэн. Миний хувьд өнөөдөр Монгол Улсын хэмжээнд 2.5 сая төгрөгийн цалин авч байгаа 1340 багш байна гэдгийг л хэлсэн. Цаашид багш нар өөрийн гүйцэтгэлийн үнэлгээнд сайн үнэлгээ авч, хүүхдүүдтэйгээ сайн ажиллаж, өөрийгөө сайн хөгжүүлж өндөр гүйцэтгэлийн үнэлгээ авсан багш нар цалин өндөр авах боломж нээгдэж байгаа шүү гэж хэлсэн. Түүнээс биш Монголын бүх багш нарын цалин 2.5 сая төгрөг болсон гэж хэлээгүй. Хөнжлийнхөө хэрээр хөлөө жийнэ гэдэг. Улсын төсөв өөрөө хязгаартай. Төсвийн 19 их наяд төгрөгийн тав орчим нь цалин, тэтгэвэрт зарцуулагддаг. Үүний нэг их наяд төгрөг нь зөвхөн боловсролын салбарын ажилчид буюу 93 мянган хүний цалин, тэтгэврийн эх үүсвэр. Тиймээс хэн дуртай нь гарч ирээд багш нарын цалинг 1000 доллар болго гээд болчихдог ид шидтэй хүн байж болохгүй" гэлээ.
