Крымийн хойгт хийсэн сөрөг довтолгооны үеэр Оросын Хар тэнгисийн флотын командлагч, адмирал Виктор Соколов болон бусад 33 офицерыг устгасан гэж Украины тал мэдэгдэв. Өнгөрсөн баасан гаригт Севастополь дахь Хар тэнгисийн флотын төв байр руу дайралт хийсэн нь Оросын тэнгисийн цэргийн дээд тушаалтнуудын уулзалттай давхцсан байна. Энэ үеэр Хар тэнгисийн флотын командлагч тэргүүтэй 34 офицер амь үрэгдэж, 105 хүн шархаджээ. Флотын төв байрны барилгыг сэргээх боломжгүйгээр сүйдсэн тухай тусгай хүчнийхэн Telegram сүлжээнд бичжээ.
Харин ОХУ-ын Батлан хамгаалах яам дээрх мэдээллийн баталж хараахан тайлбар хийгээгүй байна. Москва өмнө нь Украины халдлагыг баталсан ч нэг цэргийн албан хаагч сураггүй алга болсон гэж мэдэгдсэн юм.
Виктор Соколовын ойр дотны хүмүүс ч хэвлэлийнхний тайлбар өгөх хүсэлтэд хариу өгөхөөс татгалзжээ.
Өнгөрсөн амралтын өдрүүдэд Украины тагнуулын албаны дарга Кирило Буданов “ Америкийн дуу хоолой” радиод ярилцлага өгөхдөө, баасан гаригт болсон дайралтын үеэр наад зах нь есөн хүн амиа алдаж, 16 хүн шархадсан тухай өгүүлсэн. Буданов Соколовын нэрийг дурдаагүй ч зүүн өмнөд фронтын гол шугамын дагуух Оросын цэргийн командлагч Александр Романчук халдлагын дараа маш хүнд байдалд байгаа гэж мэдэгджээ.
