Нийслэлийн Засаг дарга бөгөөд Улаанбаатар хотын Захирагч Д.Сумъяабазар 2023 оны есдүгээр сарын 13-нд энэхүү албанд томилогдоод 1000 хоногт юу хийж амжуулснаа олон нийтэд тайлагнав. Тэрбээр “Баримтлан ажиллаж байгаа гурван суурьт хөтөлбөр буюу Эрх зүйн хөтөлбөр 70, Эдийн засгийн хөтөлбөр 60, Эрүүл засаглалын хөтөлбөр 40 хувьтай хэрэгжиж буй” гэв.
Харин бидний сэтгэлд түүний 1000 хоногоос юу үлдсэн бэ...
Өнөөдрөөр тооцвол Д.Сумъяабазар даргын сонгуульт 4 жил нь дуусахад түүнд 440 гаруй хоног үлджээ. Гэвч энэ өдрүүдэд мөрөөдөөд байгаа метрогоо бол хэзээ ч барахгүй, бас уул уурхайн ордтой ч болохгүй, бонд босгож амжлаа гэхэд үр амжихгүй л байх...
Түүний 1000 өдрийн өмнө хэлсэн "Хотын дарга бол түгжрэл, хотын тохижилт гэх мэт иргэдэд тулгамдсан асуудлаа шийдвэрлэхийн төлөө өдөр шөнөгүй ажиллана" гэх үгнээс нэмэх тэмдэгтэй зүйл лав олдохгүй нь.
Хотын даргынхаа үйл ажиллагаа, гаргаж буй шийдвэрийг нийслэлчүүдийн төлөө гэдэгт иргэд өнөөдрийг хүртэл эргэлзсэн хэвээр л байна. Гэтэл эргэлзээг тайлах бус харин ч эсрэгээрээ нэмсээр ...
Нийтийн тээврийн шинэчлэл буюу эргэлзээ төрүүлсэн “шинэ” автобус
Д.Сумъяабазарыг хотын даргын ажлыг авахад “МАН утааг шийдчихсэн” гэх мэссэжийг нэгэнт суурьшуулчихсан байсан учраас түүнд “Түгжрэл”-ийг хуваарилсан. Яг ажил хийх гэсэн чинь Нийслэлийн Засаг даргад ямар ч санхүүгийн эрх алга хэмээн удаа дараа гомдоллосны хүчинд МАН түүнд эрхийг нь өгсөн. Ингээд нийслэлийн эрхзүйн байдлын тухай хуулийг шинэчлэн баталснаар Улаанбаатар хот төсөвт төвлөрүүлдэг орлогоо зарцуулах эрхтэй болсон.
Үүгээр зогсохгүй “Төсөвт төвлөрүүлдэг 420 тэрбум төгрөгөө чи ав. Түгжрэл бууруулахад зарцуул” гэх шийдвэрийг гаргасан байдаг. Нийслэлийн Засаг дарга Д.Сумъяабазар үүнд их л баярлаж, Ерөнхий сайдтай тэврэлдээд түүнийгээ олон нийтэд мэдээлээд сүйд болсон. Гэвч ахиад л гомдоллож эхэлсэн.
Автобус авах гэсэн чинь тендерийн хууль гай болоод байна. Энэ хуулийг яаралтай өөрчил хэмээн чанга дуугарсан байдаг. Харамсалтай нь түүнийг гомдоллосоор байтал хэдийнэ 2 жил өнгөрч, сонгуулийн жил хаяанд ирсэн тул МАН ямар нэгэн аргаар түгжрэл шийдсэн нэр зүүхийн тулд автобус худалдан авах ажлыг хүртэл төрийн нууцад хамааруулсан байгаа юм. Д.Сумъяабазар даргын тайлбарласнаар “Хууль зөрчөөгүй, хуулийн дагуу ажиллаж, автобуснуудыг хурдан оруулж ирэх шийдлийг сонгосон” гэсэн. Гэтэл энэ нь Улсын төсвийн 318 тэрбум төгрөгөөр автобус авч байгаа учир төрийн нууцад оруулаад “нууц” тамгыг нь даруулах байсан аж.
Засгийн газар төрийн албаны авлига, албан тушаалын хэргийн тухай хамгийн ихээр ярьж, хэд хэдэн албан хаагчдыг ялласан боловч яг үнэндээ тендерийн хууль хотын даргад үйлчлэхгүй гэх “нууц”-ын тамга дарснаас харвал ердөө л дүр эсгэж буйгийн илэрхийлэл гэлтэй. Эсвэл дабль стандарт гэдэг нь энэ үү.
Ямартай ч Д.Сумъяабазар “ тендерийн хууль” дээгүүр алхаад өөрийнх нь хэлснээр “Daewoo” маркийн “Euro 5” дизель хөдөлгүүртэй их багтаамжийн автобусыг 336 сая төгрөг, “Skywell” маркийн цахилгаан их багтаамжийн автобус 625 сая төгрөг, “Hyundai County” маркийн дизель хөдөлгүүртэй дунд багтаамжийн автобус 228 сая төгрөгийн үнэтэйгээр авчээ.
“Daewoo” маркийн автобус хилээр орж ирлээ гээд клип хийгээдэхсэн чинь иргэд өнөөх автобусыг очиж үзээд, ухаж онгичоод эргэлзээтэй мэдээллүүд цацаж эхлэв.
Үнэхээр тухайн иргэний бичсэн шиг автобус хотын тээвэрт гарах гэж байгаа бол хүний амь насанд ч эрсдэл учирч болзошгүй нөхцөл байдал үүснэ. Гэвч одоогоор эдгээр автобусны талаар албаны тодорхой мэдээлэл алга.
Нэгэнт иргэдийн дунд эргэлзээ үүссэн учраас хотын дарга тайлбарлалаа гээд итгэх нь юу л бол.. Тэгэхээр өнөөх түгжрэлийн сайд нь эсвэл Засгийн газар асуудалд эцсийн тэг тавих нь тодорхой биз.
Автомашингүй өдөр буюу бороотой бямба гарагийн ажилгүйдэл
2023 оны эхний улиралд Дотоодын нийт бүтээгдэхүүн 7.9 хувиар өссөний 3.8 нэгж хувийг үйлчилгээний салбар бүрдүүлсэн байдаг. Үйлчилгээний салбарын нийт нэмэгдэл өртөг 3 их наяд төгрөг болж, өмнөх оны мөн үеэс 199 тэрбум төгрөгөөр өслөө гэсэн статистик ҮСХ-ноос танилцуулсан. Өөрөөр хэлбэл, манай эдийн засаг уул уурхайгаас гадна үйлчилгээний салбарын нуруун дээр тогтдог.
Гэтэл манай хот бямба гарагт автомашингүй өдөр зарлах нь хэр оновчтой байдаг вэ. Энэ талаар үйлчилгээний салбарынхнаас авсан судалгаа бий юу. Учир нь ажлын 5 хоногийн дараах амралтын өдрүүдэд иргэд хувийн ажлаа амжуулахаар гэрээсээ гардгийг манай хотын даргаас бусад нь мэддэг гэхэд хилсдэхгүй.
Өнгөрсөн бямба гарагт зарласан автомашингүй өдөр олон иргэдийг бухимдуулав. “Ядаж байхад яр нэмэр” гэгчээр бороотой өдөр таарсан. Хүүхдэд ээлгүй хотын хувьд “автомашингүй өдөр” гэдэг тэдэнд бол боломж. Дугуйгаа унана, роликтой давхина. Гэвч өнгөрсөн бямба гарагийн хувьд эмнэлгийн ачааллыг нэмэхэд л “нэмэр “ болсон болов уу.
