ОХУ-ын Засгийн газар Беларусь, Киргизстан, Армени, Казахстанаас бусад орнуудад түр хугацаагаар бензин, дизель түлш экспортлохоо зогсоосон билээ. Түр хугацаа гэж мэдэгдсэн тул хориг хэр удаан үргэлжлэх нь тодорхойгүй байгаа юм.
Барууны орнуудын зарим шинжээчид өвөл эхлэхээс өмнө ОХУ эрчим хүчний салбарт тоглолт хийж байна гэж үзэж байсан. ОХУ бол дэлхийн дизель түлшний хамгийн том нийлүүлэгч, мөн түүхий нефтийн хамгийн том үйлдвэрлэгч орон.
Кремлиэс мэдэгдэл хийхдээ дотоодын зах зээлийг тогтворжуулахын тулд ийм шийдвэр гаргалаа гэсэн билээ.
Гэхдээ зургаадугаар сард ОХУ Саудын Араб болон ОПЕК-ийн орнуудтай хамтран түүхий нефтийн экспортоо багасгасан. Түүнээс хойш газрын тосны үнэ дэлхий даяар 30 гаруй хувиар нэмэгдсэн юм.
Мөн “Eurasia Group” фирмийн Хеннинг Глойштейн “ОХУ Европ болон АНУ-ыг хохироохыг хүсэж байгаа. Одоо тэд яг л өмнө нь хийсэн үйлдлээ давтаж өвлийн өмнө нефтийн зах зээлээр тоглож байна. Дэлхийн энергийн зах зээлд эзэлдэг байр сууриа ашиглаж дуусаагүй гэдгээ харууллаа” гэж хэлжээ.
Зургаадугаар сараас хойш нефтийн экспортоо багасгасан мөн Глойштейний хэлсэн үгээс харвал ОХУ үнэхээр л нефтийг зэвсэг болгон ашиглаж байгаа мэт.
Гэхдээ эрчим хүчний экспорт Оросын засгийн газрын орлогын амин чухал эх үүсвэр. Нефтийн бүтээгдэхүүн, байгалийн хийн экспорт нь 2021 онд ОХУ-ын холбооны төсвийн 45 хувийг бүрдүүлсэн байна.
Европ ОХУ-д экспортын хориг тавьсны дараа БНХАУ, Энэтхэг, Турк гурав хамгийн том үйлчлүүлэгч нь болж хувирсан. Тус улс дайнд их хэмжээний мөнгө зарцуулж байгаа нь дамжиггүй. Иймд дайн урт хугацаанд үргэлжлэх төлөвт шилжих үед түр хугацаанд ч гэсэн экспортоо зогсоож, орлогын томоохон эх үүсвэрээ хаах нь учир дутагдалтай билээ.
Тэр бүү хэл хамгийн том хэрэглэгчдэдээ бензин, дизель түлш экспортлохоо зогсооно гэдэг нь нефтийг зэвсэг болгохоосоо илүү, үнэхээр л дотоодын зах зээлээ тогтворжуулахын тулд ийм шийдвэр гаргасан гэх дүгнэлтэд хүргэхээр байгаа юм.
