Жил бүрийн тав, есдүгээр сард номын баярыг зохион байгуулдаг уламжлалтай. Тэгвэл энэ удаагийн хаврын номын баяр “Илүү их уншъя” уриан дор тавдугаар сарын 20-22-ны өдрүүдэд үргэлжилэх ба 31 дэх удаагаа зохион байгуулагдах гэж байна. “Үндэсний бичиг соёл, номын өдрүүд-2022” арга хэмжээний нээлт өнөөдөр 11:00 цагт Сүхбаатарын талбайд болох юм.
Нээлтийн үйл ажиллагаанд, УИХ-ын дарга Г.Занданшатар, УИХ-ын гишүүд, Засгийн газрын гишүүд, Нийслэлийн Засаг дарга бөгөөд Улаанбаатар хотын захирагч Д.Сумъяабазар, Соёлын дэд сайд М.Батбаяр, ОХУ, БНАСАУ, Их Британи Умард Ирландын нэгдсэн хаан улс, Кувейт, БНИУ, БНСВУ-аас Монгол Улсад суугаа дипломат төлөөлөгчийн газрын тэргүүн нар, Япон, Бүгд найрамдах Беларусь, Австралийн Холбооны Улс, Бүгд Найрамдах Болгар улс, Швейцарын Холбооны Улсуудын дипломат ажилтнууд болон ОХУ-ын зочин зохиолчид оролцоно.
Мөн энэ өдрийн арга хэмжээнд хүүхдийн зохиолчдын номын болон үлгэрийн баатруудын баярын жагсаал болохын зэрэгцээ Ардын уран зохиолч болон ахмад зохиолчдод хүндэтгэл үзүүлж, Цагдаагийн Ерөнхий газрын “СҮЛД” чуулга, Улсын филармонийн уран бүтээлчид урлаг, соёлын үзүүлбэр толилуулах аж.
