Европын парламент Минскийн Засгийн газрыг Украины эсрэг түрэмгийллийн хамсаатан гэж хүлээн зөвшөөрөв.
Энэ сарын 13-нд Европын парламент ЕХ-ноос Беларусын нөхцөл байдлын талаарх шинэ тогтоолыг баталсан юм. Хуралд оролцсон нийт 514 гишүүний 453 нь уг тогтоолыг дэмжсэн байна.
Шинэ батлагдсан тогтоолын дагуу Лукашенкогийн дэглэм ОХУ-ын Украинд үйлдсэн гэмт хэргийн хамсаатан хэмээн Европын парламент үзэв. Түүнчлэн Европын парламент Лукашенкогийн хөрөнгийг хурааж, Украины сэргээн босголтод шилжүүлэх хууль эрх зүйн боломжийг хайж олохыг уриалав.
Мөн Украины хүүхдүүд, тэр дундаа бүтэн өнчин хүүхдүүдийг Орост эзлэгдсэн Украины нутаг дэвсгэрээс Беларусын нутаг дэвсгэр дэх эрүүл мэндийн лагерь гэж нэрлэгдэх газар руу хууль бусаар албадан гаргаж, тэднийг оросжуулах үзэл суртлын хохирогч болгож буйг буруушаав.
Александр Лукашенко болон түүний тойрон хүрээлэгчдийн ийм үйлдлийг хүн төрөлхтний эсрэг гэмт хэрэгтэй адилтгаж болно гэж Европын парламентын гишүүд үзэж буй юм. Тиймээс Лукашенко эдгээр гэмт хэрэгт ОХУ-ын төрийн тэргүүн Владимир Путин, ОХУ-ын Ерөнхийлөгчийн Хүүхдийн эрхийн асуудал эрхэлсэн комиссар Мария Львова-Белова нартай адилхан хариуцлага хүлээх хэрэгтэй хэмээн мэдэгдлээ. Украинд үйлдэгдсэн дайны гэмт хэрэгтэй холбогдуулан ОХУ-ын ерөнхийлөгч Владимир Путинийг баривчлах захирамжийг Олон Улсын Эрүүгийн Шүүх гаргасан билээ.
Тэгвэл Европын парламентын гишүүд Олон Улсын Эрүүгийн Шүүхэд хандан Лукашенког мөн баривчлах тушаал гаргуулах боломжийг авч үзэхийг уриалав. "Бид Лукашенкод хариуцлага хүлээлгэхийн тулд чадах бүхнээ хийнэ гэж найдаж байна" гэжээ.
