Монгол Улсын дээд шүүхийн хуралдаан 2022 оны 5 дугаар сарын 20-ны өдөр буюу өнөөдөр товлогдсон билээ. Уг хуралдаанаар хуулийн этгээдийн мэдээлэлд оруулсан өөрчлөлтийг улсын бүртгэлд бүртгүүлэх тухай Ардчилсан намын хүсэлт болон Э.Оюунгэрэлийн Иргэдийн оролцооны нэгдэл нам үүсгэн байгуулсныг улсын бүртгэлд бүртгүүлэх хүсэлтийг тус тус хэлэлцэнэ.
Ерөнхийлөгч асан Х.Баттулгыг түүний дэмжигчид АН-ын даргаар бүртгүүлэх хүсэлтээ өгсөн ба уг хүсэлтийг Дээд шүүх хэлэлцэх аж.
Харин өчигдөр Ардчилсан намын 4/11 ээлжит мэдээлэл Төрийн ордонд болох үеэр "Ардчилсан намын нэр барьсан хууль бус этгээдүүд Улсын дээд шүүхэд нөлөөлөх" гэж оролдож байгаа талаар мэдээлэл хүргэсэн билээ. Тус намын Ерөнхий нарийн бичгийн дарга Ч.Өнөрбаяр: Маргааш буюу тавдугаар сарын 20-ны өдөр Улсын дээд шүүхийн нийт шүүгчдийн хуралдаанд өөрийгөө Ардчилсан намын дарга гээд яваад байгаа хэсэг бүлэг хүн нөлөө үзүүлэх гэж байна. Тиймээс АН-ын удирдлагын зөвлөл энэхүү мэдээллийг хийж байна.Тэр хүн “хаан” байх үеэсээ шүүх рүү дайрсан, түүний Тамгын газрын дарга байсан нэг нөхөр бий. УИХ-ын даргын дүрээсээ одоо болтол гарахгүй яваад байгаа. Энэ хоёр хүн үргэлж хараат бусаар ажиллах ёстой шүүх эрх мэдлийн дархлааг үгүй хийх гэж оролдож байсан." хэмээн мэдэгдсэн юм. Мөн Ерөнхийлөгч асан Х.Баттулга АН-ын даргаар өөрийгөө бүртгүүлэхийн тулд амь тэмцэн эцсийн аргаа хэрэглэж байна. Тэрбээр настай хэдэн хүмүүсийг өдрийн 100 мянган төгрөгийн ханшаар хөлсөлж гурван өдрийн жагсаал зохион байгуулж байна.
