"Нүүрсний" гэх тодотголтой эрүүгийн хэрэгт холбогдуулан нийслэлийн Прокурорын газраас УИХ-ын гишүүн асан Т.Аюурсайхан, ЭТТ ХК-ийн гүйцэтгэх захирал асан Б.Ганхуяг нарыг 11 хүнд яллах дүгнэлт үйлдэж, Чингэлтэй дүүргийн Эрүүгийн хэргийн анхан шатны шүүхэд шилжүүлсэн.
Яллагдагч нарын өмгөөлөгчдийн хүсэлтээр нүүрсний гэх Эрүүгийн хэргийн урьдчилсан хэлэлцүүлгийн шүүх хуралдаан өнгөрсөн мягмар гарагт болж, тодорхойгүй хугацаагаар хойшилсон.
Яллагдагчаар татагдсан Б.Ганхуяг урьдчилсан хэлэлцүүлгийн шүүх хуралдааны үеэр "Намайг жагсаал зохион байгуулсан гэх хэргээр цагдан хорьсон. Надтай хамт 61 хүн байсан. Одоо би гав ганцаараа хоригдож байна. Яахав байлгах сонирхол байгаа учраас байлгаж байгаа юм. Яагаад гэвэл намайг гаргавал маш олон хүний зүрх зогсох гээд байна.Гадаа гарч үг хэлүүлэхгүй байна. Ганц боломж нь энэ байна. Тиймээс би үгээ хэлэх эрхтэй учраас хэлээд байна" гээд Чингэлтэй дүүргийн анхан шатны нийт шүүгчдээс татгалзаж байна гэдгээ илэрхийлсэн.
Харин өнөөдөр түүний Хүний Эрхийн Үндэсний комисст хандан бичсэн захидал нийтэд ил болов. Захидалд " Монгол Улсад хүний эрхийн асуудал, эрх эрх чөлөөний тухай ойлголт түүнд санаа зовдог, сэтгэлээ чилээдэг нэг ч гэсэн газар байдаг, байсан, байсаар ирсэн гэдэгт би итгэхийг чин сэтгэлээсээ хүсэж байна.
Баттулга овогтой Ганхуяг миний бие 2022 оны 12 дугаар сарын 08-ны өдрөөс хойш энэ өдөр хүртэл 9 сар гаруй хугацаанд улс төрийн хоригдол болж сууж эрүүдэн шүүгдэж, залхаан цээрлүүлэлтэд ороод хилс хэрэгт гүтгэгдэж, МУ-ын Ерөнхий сайд Л.Оюун-Эрдэнийн шаардлага захиалгаар түүний гар хөл болсон АТГ, барьцаалагдсан прокурор, шүүхийн шийдвэрийн золиос болсоор удаж байна.
Анх намайг цагдан хорихдоо Ерөнхий сайдын зүгээс болон ЦЕГ-ын удирдлага, ХЗДХЯ-ны ТНБД нарын зүгээс удаа дараа хэвлэлийн бага хурал зохион байгуулж, 2022 оны 12 сарын 4-нөөс эхэлсэн" хэмээн бичсэн байна.