Хуульзүй Дотоод хэргийн яамны Төрийн нарийн бичгийн дарга П.САЙНЗОРИГ:
-Сэргээш илэрсэн бөх В сорьцын шинжилгээгээ 21 хоногийн дотор өгнө. Допингийн үндэсний төвөөр дамжуулан БНСУ-ын тухайн лабораторийг хариугаа яаралтай ирүүлэхийг уламжилсан. Нэг зүйлийг сайн ойлгох хэрэгтэй. Сэргээшийн шинжилгээ авах үйл явц тэр чигтээ хууль хяналтын байгууллагын хяналт дор явагддаг. Ямар нэгэн байдлаар солигдох боломжгүй. Бөхчүүд хариуцлагаа хүлээж сурмаар байна. Ёсзүйгүй, аль нэг байгууллагыг буруутгадаг, үүндээ ард иргэдийг талцуулдаг байж болохгүй. Үнэхээр шээс сольдог бол баримттай нь гаргаад ир.
- Би сүүлийн 2 жил энэ асуудлыг хариуцаж байна. Тагнуул болон АТГ, ЦЕГ -ынхан өөрсдөө шинжилгээ авах үйл явцаа оролцдог. Бөхчүүд жудагтай баймаар байна. Амжилтад хүрэхийн тулд янз бүрийн башир арга хэрэглэдэг. Тэр нь илэрчихээр иргэдийн худлаа мэдээллээр талцуулдаг, нутаг усаараа талцдаг, би л хэлмэгдэх гээд байна гэдэг сэтгэлгээгээ болих хэрэгтэй.
- Допингийн эсрэг үндэсний төвд асуудал байгаа. Үүнийг тусдаа ярих ёстой. Бүх шинжилгээний хариу зэрэг ирэх ёстой гэж байна. Үнэндээ асуудалтай хүнийх үлдчихдэг юм билээ. Хүний хувь заяаг шийдэж байгаа учир нягталдаг.
- Наадмын өмнө түрүү бөхөөс сэргээш илэрнэ гэж ярьсан гэх мэт утгагүй, үлгэрийн зохиомж ярихаа боль. Төрийн наадмыг татвар төлөгчийн мөнгөөр зохион байгуулдаг. Гэтэл наадам будилуулсан нөхөр Монгол Улсын төрт уламжлал, ард түмний баяр цэнгэлийг гутааж болохгүй.
- М.Бадарч өөрөө олон зүйл ярьсан. Бэртэл гэмтэл гээд. Гэхдээ үүнийгээ ил тод ярих ёстой. Татвар төлөгчийн наадмыг будилуулчихаад шударга байх хэрэгтэй. Нүүр тулаад уулзахаар нэг юм ярьдаг, хэвлэлээр гарахаараа өөр юм ярьдаг. Төрийн албан хаагчид руу дайраад байвал бид хэд асуудалгүй гэж боддог юм уу. Үнэхээр эгдүүцэж байна.
- Би бүх сувгаар доромжлол амсаж байна. Сүүлдээ бүр Архангайд ирвэл ална шүү гэдэг мессэж хүртэл ирж байна. Шударгаар хариуцлагаа хүлээх хэрэгтэй.
