Ливи улсын боомтын хот Дернаг өнгөрсөн амралтын өдөр Даниел хуй салхи дайран өнгөрчээ. Хуй салхины үеэр цунамийн давалгаа мэт үерийн ус далан сэтлэн бууж 5,300 хүн амь эрсэдсэнийг орон нутгийн эрх баригчид мэдээлээд байна. Дерна хот нь далайн эрэг дээр байрладаг бөгөөд 10,000 орчим хүн үерт урсаж ор сураггүй алга болжээ. Эдгээр хүмүүсийн дийлэнх нь далай руу шидэгдсэн байж болзошгүй гэж үзэж байна. Үерийн улмаас Дерна хотын хоёр том далан, дөрвөн гүүр нуржээ. Египет улсаас аврагчид тусламжийн бараа ачин ирж байгаа ч Ливи улсын улс төрийн нөхцөл байдал аврах ажиллагаанд саад учруулж байна. Тус улс нь хоёр Засгийн газрыг бүрдүүлж, өөр хоорондоо сөргөлдсөөр байгаа юм.
Даниел хуй салхи Бенгази, Сусса, Мисрата, Аль-Марж хотуудыг дайран өнгөрсөн ч Дерна хот хамгийн их гарз хохирол амсаж, үерт автсан шалтгааныг тогтоох мөрдөн шинжилгээний баг байгуулагджээ. Дерна хотыг сэргээн босгох ажилд 515 сая ам.долларын тусламж үзүүлэхээр болсон байна. Египетээс гадна Америк, Герман, Иран, Итали, Катар, Турк улсуудаас илгээсэн тусламж замдаа гарчээ. Далай тэнгисийн уснаас иргэдийг эрэн хайж аврах ажилд тэнгисийн цэргийн алба хаагчид болон шумбагчид тусалж байна.
