Орон сууцны хөнгөлөлттэй ипотекийн зээлийн 1 хувийн шимтгэлтэй холбоотой шүүхийн шийдвэрийн талаар талууд зөрүүтэй байр суурийг илэрхийлж байна.
Даваа гарагт (2023.09.11) тухайн агуулгаар ажилласан хуульч "Арилжааны банкуудын нэг хувийн шимтгэл авч байсныг буруутайд тооцлоо. Тооцсон хугацаанд зээл авсан 150 мянган иргэний нэг хувийн шимтгэлийг банкууд буцаан олгоно. Олгохгүй бол хууль хяналтын байгууллагад хандах эрхтэй" гэсэн ойлголтыг нийтэд өгсөн.
Гэтэл өчигдөр (2023.09.12) Монголын банкны холбооноос ташаа мэдээлэл гараад байгаа тул гэсэн тодотголтой мэдүүлэг гаргасан юм.
Онцлоход, шүүхийн шийдвэрт банкууд ипотекийн зээлийн шимтгэлийг авах эрхгүй, буцааж төлөх, шилжүүлэх гэсэн агуулга байхгүй. Харин шимтгэлийг зээл олголтын үед гарсан зардалтай уялдуулан тогтоох арга хэмжээ авахаар болсон гэж мэдэгдлээ.
