"Нүүрсний" гэх тодотголтой эрүүгийн хэрэгт холбогдуулан нийслэлийн Прокурорын газраас Т.Аюурсайхан, Б.Ганхуяг нарыг 11 хүнд яллах дүгнэлт үйлдэж, Чингэлтэй дүүргийн Эрүүгийн хэргийн анхан шатны шүүхэд шилжүүлээд байгаа.
Яллагдагч нарын өмгөөлөгчдийн хүсэлтээр нүүрсний гэх Эрүүгийн хэргийн урьдчилсан хэлэлцүүлгийн шүүх хуралдаан өнөөдөр өглөө 09 цагт эхлээд байна.
Яллагдагчаар татагдсан Т.Аюурсайхан сэтгүүлчдийн асуултад хариуллаа.
-Та хэрэгтэйгээ танилцсан байх. Таныг гэмт бүлэглэл зохион байгуулсан, бусдыг элсүүлсэн гэх үндэслэлээр буруутгаад байгаа талаар ямар хариулт өгөх вэ?
Намайг зохион байгуулалттай гэмт бүлэглэл байгуулах бусдыг элсүүлсэн, үндэслэлгүй хөрөнгөжсөн гэдгээр буруутган яллагдагчаар татсан. Энэ бол байж боломгүй, санаанд оромгүй заалт. МАН-ын Шинэчлэлийн хороо гэдэг 2016 оноос хойш үйл ажиллагаа явуулаагүй. Тухайн үед улс төрийн нам дотор бугшсан асуудлын эсрэг тэмцэж байсан гэдгийг та бүхэн мэднэ. Үндсэн хуулийн дагуу иргэд эвлэлдэн нэгдэх эрхтэй биз дээ. Тэр дагуу л ажиллаж байсан. Үндэслэлгүй хөрөнгөжинө гэдгийн хувьд би хуулийн байгууллагад шалгуулья гэж хандаж, бусдыгаа ч уриалж байсан.
Нүүрсний хэрэгт холбогдуулж над дээр нэлээн удаан л шалгалт хийлээ. Ямар нэгэн зүйл гараагүй.
Миний ажлын албанд ажиллаж байсан хүмүүс “Эрдэнэс Тавантолгой”-д ажилд орсон зүйл бий. Тэр хүмүүсийн хаана ажиллах нь өөрсдийнх нь эрхийн асуудал.
-Таныг Ерөнхийлөгчөөс тусламж хүсч, уулзсан гэх мэдээлэл байна?
-Ерөнхийлөгчтэй уулзаагүй нэлээн удаж байна. Намынхан, ер нь хүмүүстэй уулзах боломж ч хязгаарлагдмал байна.
Шүүх хуралдаан яагаад олон нийтэд нээлттэй байх ёстой гэж үзээд байна вэ гэхээр нүүрсний гэх хэрэг үнэн зөвөөр шийдэгдээсэй, олон нийт үнэнийг мэдээсэй, холбогдох арга хэмжээ шүүхийн байгууллага аваасай гэж хүссэндээ энд байна. Яг надтай холбоотой нүүрсний хэрэгт холбогдсон зүйл бол байхгүй. Асуудлууд эцэслэн тодорхой болоогүй, сонсгол явагдаагүй, хуулийн байгууллагын дүгнэлтүүд гараагүй байна. Гэхдээ өнгөрсөн 9 сарын хугацаанд намайг зохион байгуулалттайгаар харлуулах гэсэн оролдлого, гаргасан санхүүжилтийг та бүхэн ч гэсэн мэдэж, харж л байгаа байх. Маш тодорхой байдлаар энэ хэргийг нэг хүн рүү чиглүүлээд байгаа нь яг бодит нүүрсний хэргийг замхруулах гэж оролдоод байгаа юм биш биз дээ. Энэ асуудлаар шүүх нүүрсний хэргийг шийдчихлээ гэдэг байдлаар зарим этгээд хариуцлагаас мултрах гээд байгаа юм биш үү гэх хардлага миний зүгээс байна.
Нүүрсний хэрэг яриагдаж эхлэхэд төмөр зам, оффтейк гэрээ гээд маш олон асуудал хөндөгдөж байсан. Гэвч энэ асуудлууд яг хаана байгаа юм бэ. Энэ дотор бол байхгүй гэдгийг та бүхэн тодорхой харах болно.
Мөрдөн байцаалтын ажиллагаа, шүүхээр хянан шалгах ажиллагаа дуусаагүй байгаа учраас миний хэлэх зүйл хязгаарлагдмал байна.
Ямар хүмүүс энэ хэргийн ард байгааг та бүхэн шүүх процессын үеэр харах байх.
Нүүрсний сонсголд ч би оролцох хүсэлтээ тавина. Тэнд оролцож 9 сарын хугацаанд намайг яагаад буруутгаад байгааг би мэдмээр байна.
