Улс төрийн хэлмэгдэгсдийн дурсгалын өдөрт зориулсан арга хэмжээг Монголын бурхан шашинтны төв Гандантэгчэнлин хийд зохион байгуулж байна. Арга хэмжээний үеэр Гандантэгчэнлин хийдийн тэргүүн хамба лам, номун хан Д.Чойжамц үг хэлэхдээ: " Монгол оронд өрнөсөн улс төрийн хэлмэгдүүлэлт нь одоогоос 100 гаруй жилийн өмнө Зөвлөлт Холбоот Улс, Коминтерний зааврыг эсэргүүцсэн Монголын төр нийгмийн зүтгэлтнүүдийг хилс хэрэгт тулган яллаж, цаазалсан явдлаар анх эхэлсэн байдаг. Улмаар язгууртнууд, үндэсний хөрөнгөтнүүд, эрдэмтэн, лам хуврагууд, сэхээтнүүдийн төлөөллийг үе шаттайгаар хилсээр хэлмэгдүүлсээр 1937 он гаргасан. Ердөө 87 жилийн өмнөх яг энэ өдөр Монголын түүхэнд хэзээ ч арилашгүй цусан мөр үлдээсэн онцгой бүрэн эрхт комисс байгуулагдсанаар Монгол орныг улс төрийн их хэлмэгдүүлэлт бүхэлд нь нэрвэх эхлэл тавигдсан юм. Тус онцгой бүрэн эрхт комисс зөвхөн 1937-1939 оны хооронд нийт 51 удаа хуралдахдаа 20 гаруй мянган хүмүүст улс төрийн хилс хэрэгт тохон, буудан ял оноон, гүйцэтгэсэн байдаг. Энэ явц зөвхөн хэлмэгдүүлэлт төдий бус хомроглон устгах үйл ажиллагаа болж өргөжсөн юм. Үндсэндээ 1922-1955 оны хооронд явагдсан хэлмэгдүүлэлтийн цуст яргаллаар нийт хүн амын 5 хувь, насанд хүрсэн эрэгтэйчүүдийн 10, 9 хувь нь улс төрийн их хэлмэгдүүлэлтийн их шуурганд амиа алдсан нь үнэхээр зүрх шимшрэм. Энэ тоо үзүүлэлтийг үзвэл тухайн үеийн айл өрх бүр шууд болон шууд бусаар улс төрийн их хэлмэгдүүлэлтийн тэсвэрлэхүйяа бэрх гашуун зовлонг туулсан байдаг. Тус улс төрийн их хэлмэгдүүлэлт нь Их Монгол Улсыг байгуулалцсан Эзэн Богд Чингис хааны алтан ургийн удмыг тасалж, алдраа дуурсгасан аугаа баатруудын түүхийг баллуурдаж, 200 гаруй жил тогтносон Манж Чин улсын ноёрхлоос салах үйлсийг оройлон, туурга тусгаар Богд Хаант Улсыг байгуулсан 8-р Богд Жавзандамба тэргүүтэй гавьяатнуудыг доромжилж, түүний төр, шашины үйлс, амиа хайрлалгүй зүтгэсэн хутагт хувилгаад болон бурханы шашины 3 ай савны ном эрдэмд мэргэжсэн олон мянган лам хуврагуудыг егүүтгэснээс гадна тухайн үеийн нийгмийн бүх давхаргад хэзээ ч арилашгүй цусан мөрөө үлдээсэн билээ. Түүнээс гадна уламжлалт бурханы шашины 1000 гаруй хүрээ хийд, асар нандин бурхан шүтээн, хосгүй гайхамшигт урлагийн бүтээл, шашины эд зүйлийг тонон, дээрэмдэж эвдэн сүйтгэснээс гадна олон зууныг дамнан оршин тогтнож байсан Монголын үе үеийн нийгмийн санах ой болсон түүхийн сурвалж бичиг , Монголын аугаа эрдэмтэн лам нарын 10 ухааны чиглэлээр туурвисан оюуны хосгүй бүтээл, шаштир, судар ном, ургийн бичиг хөтлөх ёс зэрэг асар их өв соёлыг зориуд устгаж, оронд нь улс төрийн үзэл сурталжсан шинэ коммунист түүхийг тулгаж, нэгэн жарныхны тархийг угаасны үр дагавраар энэ үед өөрсдийн бахархах учиртай түүх, бичиг үсэг, шашин соёл, удам угсаагаа сайн мэдэхгүйд хүрч байна" гэв.
