Баянгол дүүргийн Ардчилсан намын “Улс төрийн намрын үйл ажиллагааны нээлт-2023” өнөөдөр болж байна. Уг үйл ажиллагаанд Баянгол дүүргийн АН-ын дарга Н.Болдбаатар, УИХ-ын гишүүн асан С.Эрдэнэ болон намын гишүүд оролцож буй юм.
Нээлтийн ажиллагаанд С.Эрдэнэ үг хэлэхдээ: "Баянголчууд угаасаа цоглог, зовхи нь өөдөө хүмүүс. Нийслэл Улаанбаатар хотын өнгө төрхийг тодорхойлдог дүүрэг бол Баянгол. Баянгол дүүрэгт оюунлаг, дундаж амьжиргаатай, иргэд зонхилдог. Энэ дүүргээс маш олон алдартнууд, улс төрчид, урлаг, спортынхон төрж гарсан. Би дүүргээрээ үнэхээр бахархдаг. Олон олон зүйлийн анхдагч болж байсан дүүрэг. Улс төрийн үйл ажиллагаанд ч манай Баянгол дүүргийн АН-ынхан байнга манлайлж байдаг. Хүний өөрийнгүй хүмүүсийн цагаан атааг төрүүлж байдаг. Энэ дүүргийн эд болсон та бүхнээрээ үнэхээр их бахархаж явдаг.
Баянгол дүүрэг АН-ын үед ямар хэмжээний хөрөнгө оруулалт хийж, яаж өөрчлөгдсөн бэ? гэдгийг та бүхэн сайн мэдэж байгаа. Харин сүүлийн 4 жил өнөөгийн эрх баригчид яаж нурсан, эвдэрсэн, хэмхэрсэн нөхцөл байдал руу нь оруулж байгааг та бүхэн бас харж байгаа. Тиймээс ч бид үтэр түргэн энэ бүхнийг зогсоож, эрх баригчдын иргэдээ ялгаварлан гадуурхдаг байдлыг таслан зогсоох ёстой. " гэсэн бол
Н.Болдбаатар: "Өнөөдрийн арга хэмжээг Тоорил ханы шүтдэг Зүрх уулын бэлд хийж байгаа маань учиртай. Энэ хайрхан бол аав хайрхан гэж бэлгэшээдэг. Бид аав хайрхандаа элэг бүтэн болж ирж байна. Сүүлийн 3 жил МАН эрх барьж, Баянгол дүүргийг эзэнгүй болгож, хөгжлийг нь доройтуулж байна. Үүнийг 2024 онд бид зад цохих ёстой. Баянгол дүүргийн хөгжлийг өмнөх Шинэчлэлийн баг, Шийдлийн баг шиг дахин үргэлжлүүлэх ёстой" гэв.
