"Монголын Нотариатчидын танхим"-аас цаг үeийн асуудлаар мэдээлэл хийлээ.
Нотариатын байгууллага үйл ажиллагаагаа цахим хэлбэрт шилжүүлсэн. Тухайлбал, иргэний үнэмлэх шаардахгүйгээр хурууны хээгээ уншуулж нотариатын үйлчилгээ авах боломжтой болсон. Мөн Нотариатчдын танхим E-Mongolia Төрийн үйлчилгээний цахим системд 2023 оны 6 дугаар сард холбосон бөгөөд үүний үр дүнд өнөөдрийн байдлаар 30 000 хүсэлт бүртгэгдэж, лавлагаа болон хуулбар авсан байна. Энэ нь орон нутагт амьдардаг иргэдэд цаг хугацаа, зардал хэмнэх, орон зайг дөтлөх боломжийг бүрдүүлжээ.
Монголын нотариатчдын танхимын ерөнхийлөгч Ч.Баянжаргал "Гадаад улсад сурч, ажиллаж амьдарч буй иргэдэд нотариатын үйлчилгээ авах хэрэгцээ шаардлага байдаг. Энэ үйлчилгээг цахимжуулж, иргэн гадаад улсад гэрчлэгдсэн баримт бичгийг зөвхөн Гадаад харилцааны яамны Консулын газраас авдаг байсан бол одоо өөрт хамгийн ойр байрлах нотариатчаас авах боломжтой болсон юм.
Монголын Нотариатчдын танхим нь дээрх ажлуудыг хийх, цахим нотариат системээ хөгжүүлэхдээ өөрсдийн дотоод боломжоо ашиглан санхүүжилтээ хийсэн. Бид улсын төсвөөс санхүүждэггүй, өөрийн үйл ажиллагааны зардлаа хариуцан ажилладаг.
Гэвч инфляц өсөж, нотариатын албан хэрэгцээний канон, принтерийн хор, бичгийн цаасны үнэ, ажлын байрны түрээсийн үнэ өссөн. Иймд Нотариатын тухай хуулийн 12 дугаар зүйлийн 12.3-т “Танхимын саналыг үндэслэн хууль зүйн асуудал эрхэлсэн Засгийн газрын гишүүн нотариатын үйлчилгээний хөлс болон тээврийн зардлын хэмжээг баталдаг учраас баримт бичгийн хуулбар, орчуулга, гарын үсгийн баталгаа гэрчлэх гэх мэт тодорхой төрлийн нотариатын үйлчилгээний хөлс, зардлаа нэмэгдүүлэх саналаа Хууль зүй, дотоод хэргийн яаманд уламжлахаар болоод байна." гэв.
