Есдүгээр сарын байдлаар нийслэлийн хэмжээнд 50 гаруй цахилгаан автобус оруулж ирээд байгааг Нийслэлийн Засаг даргын тамгын газар мэдээллээ.
Энэ онд Засгийн газрын оролцоотойгоор нийт 810 автобус буюу цахилгаан хөдөлгүүртэй 160, дизель хөдөлгүүртэй 600, дунд багтаамжийн 50 автобус оруулж ирэхээр төлөвлөөд байгаа юм. Парк шинэчлэлтийг улсын төсвийн 272.2 тэрбум төгрөгөөр, хоёр үе шаттайгаар хийнэ.
Мөн нийтийн тээврийн парк шинэчлэлийн хүрээнд цахилгаан автобус цэнэглэх зориулалтын 40 цэг байгуулах аж. Тухайлбал: 28-ыг нь авто паркт, үлдсэнийг нь автобусны эцсийн зогсоолуудад байршуулах юм байна.
“Нийтийн тээврийн автобусны 50-60 хувь нь цахилгаан автобус байх боломжтой” гэж Нийслэлийн Засаг даргын эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн мэдээлсэн юм. Хэдий тийм боловч цахилгаан автобусны үнэ дизель автобустай харьцуулахад 60-70 хувиар өндөр байдаг нь олноор оруулж ирэх бололцоо хомс байна гэж тодотгож байна.
Олон улсын хэмжээнд 2032 он гэхэд нийтийн тээврийн нийт автобусны 50 хувь нь цахилгаан хөдөлгүүртэй болохоор байгааг “Bloomberg New Energy Finance”-ийн тайланд дурджээ.
Үүнээс гадна оны эхний найман сарын байдлаар Монгол Улс 320 цахилгаан автомашин импортолсон гэж Монголын автомашины дистрибьютерүүдийн ассоциаци мэдээллээ.
Энэ оны эцэс гэхэд 400 хүрэх төлөвтэй байгаа аж. Өнгөрсөн онд 253 цахилгаан автомашин импортолж байжээ. Энэ жилийн хувьд эрэлт хоёр дахин өссөн гэж тус ассоциаци онцолж байна.
Өнөөдрийн байдлаар 6-7 компани цахилгаан автомашин импортолж байгаа аж. Цахилгаан автомашины доод үнэ 90 сая төгрөг байгаа бол дээд үнэ нь 300 сая төгрөг байна.
