ХЗДХ-ийн сайд Х.Нямбаатар дараах мэдээллийг өгөв:
-Нүүрсний хэргийн сонсгол явуулахын тулд эхлээд хянан шалгагч, шинжээч нараа томилно. Бид уул уурхай салбарын мэргэшсэн инженерүүд, маркшэйдэрүүдийг судалж байна. Маргааш түр хороо хуралдана. УИХ-ын зарим гишүүн гадаад томилолттой байгаа тул түр хорооны ирц бүрдэхгүй байна. Томилгооны дараа шинжээчид нотлох баримтуудтай танилцан, дүгнэлтээ гаргана. Арав эсвэл арваннэгдүгээр сард сонсгол болох болов уу.
Хэрэг нь шүүх рүү шилжсэн хүмүүсийг ч сонсголд оролцуулж, үгийг нь сонсоно. Сонсгол зохион байгуулж байгаа гол зорилго нь дахин нүүрсний хулгай гаргахгүй байх, засаглалаа сайжруулах юм. “ЭТТ” ХК-д тусгай зөвшөөрөл олгосноос хойших бүх цаг үеийг хамарсан шалгалт явуулна. Бүх талаас нь судлахаар төлөвлөж байна. “ЭТТ”-н бүрэн эрхт төлөөлөгч Б.Ганбатын ажиллах хугацаа хэзээ дуусахыг би мэдэхгүй байна. Хариуцсан сайд нь би биш. Ер нь бүрэн эрхт төлөөлөгч томилох нь зөв шийдэл биш. Бусад хөрөнгө оруулагчдын эрхийг зөрчих эрсдэлтэй. Ирэх оны эхээр бид авлигын үнэлгээгээ "Транспэрэнси интернэйшнл"-ээр хийлгэнэ. Цаашид төр ямар бизнес хийж, ямрыг нь хийхгүй вэ гэдгийг хуулийн төсөлд тусгасан. Энэ хуулийг баталбал Оюутны холбооны удирдлага шууд төрийн компанийн захирал болохгүй гэв.
