Цахим орчинд идэвхитэй шүүмжлэгчдийн нэг Б.Жаргалсайхан өөрийн фэйсбүүк хуудастаа Ерөнхийлөгч асан Ц.Элбэгдоржын талаар сонирхолтой өнцөгөөр сэтгэгдлээ буулгажээ. Тэрбээр:
"Орос руу дайрч сүр сүлдгүй болсон Наполеон Бонапарт Лайпцигт бут ниргүүлсэн учир хаан ширээнээсээ хөөгдөн Эльба арал руу хөөгдөв. Гэвч жилийн дараа Эльба арлаас оргон ирж эзэн хаан болсон. Цөллөгөөс оргоход тодорхой нөхдүүд туслаж эзэн хаан болсон түүхтэй. Цөллөгийн оргодол Эзэн хаан болоход Францын язгууртнуудын дотоод зөрчил, нийгмийн ядуурал, доройтол нөлөөснөөс гадна энэ байдлаас Наполеон Бонапарт гаргаж чадна, тэр дайнаас олз омог олдог гэсэн горьдлого байсан юм билээ. Түүнтэй төстэй нь АН-ын гишүүд Ц.Элбэгдоржийгоо хүсэмжилж эхэлсэн байна. Мань эрийн хувьд хоёр ч удаа Ерөнхий сайдаас хөөгдсөн ч гэлээ Ерөнхийлөгчөөр эргэн ирсэн нэгэн. Үүгээр ч зогсохгүй АН-ыг хоёр удаа ялалтад хөтлөсөн гэх сайшаалтай. АН-ын дотоод зөрчил "Аргаа барсан хүн аавынхаа толгойг илнэ" гэгчээр Ц.Элбэгдоржийгоо залахаар шийдэв. Түүний тухайд 2021 онд улс төрөөс гарсан ч хойноос нь зүүгдэх шүүх цагдаагаас эхлээд АН-ын гишүүд улс төрийн цөллөгөөс эргэн ирэхэд нөлөөлсөн болов уу. Тэр хүнийг хүсэмжлэх гишүүд байгаа учраас дахин дахиулахаар тайзан дээр гаргалаа" гэжээ.
