ЗТХ-ийн сайд С.Бямбацогтыг АТГ-т шалгуулах талаар хохирогч нь гэх иргэд мэдээлэл өгч байна.
ЗТХ-ийн сайд С.Бямбацогтыг АТГ-т шалгуулахаар болсон талаараа Драгон худалдааны төвд түрээсийн үйл ажиллагаа явуулдаг иргэдийн төлөөлөл мэдээлэл хийлээ.
Түрээслэгчдийн төлөөлөл "Драгон худалдааны төвд 2,000 түрээслэгч бий. Тэдний ард тээвэрчид гээд 2,000-аад хүний амьдрал ЗТХ-ийн сайдын гаргасан шийдвэрээс болж, амьдрах нөхцөлгүй боллоо. Бид авто вокзалыг дагаж амьдрал ахуйгаа авч явдаг жижиг бизнес эрхлэгчид.
Сайд С.Бямбацогт огцом шийдвэр гаргаж, өөрийн доор ажилладаг АТҮТ-ийг дарга Б.Гүрсоронзонг шаханд оруулан бидэнд сануулалгүй авто вокзалыг нүүлгэх шийдвэр гаргасан. Уг шийдвэр нь тендер зарлаагүй, "Номин"-гийн агуулах руу нүүлгэх шийдвэр гаргасан. Сайд үүнийгээ тайлбарлахдаа би огт оролцоогүй гэсэн.
Өчигдөр хэвлэл мэдээллийн хэрэгслээр АТҮТ-ийн даргын хоёр төрлийн гэрээ гарч ирсэн.
Нэг дэх гэрээ: АТҮТ-ийг Ариг банканд байрлах Номин реалтор компанийн байранд 47.3 сая төгрөгийн түрээсээр оруулсан байгаа.
Хоёр дахь гэрээ: Драгон төвд байсан авто вокзалыг 10 буудлын Номин агуулах руу нүүлгэсэн гэрээ. Энэ нь сарын 30 сая төгрөгийн түрээс төлөхөөр хийгдсэн байна.
Энэ нь нэг компанийг дэмжсэн үйл ажиллагаа болж байна, энэ мөнгөөрөө цэцэрлэг, хөгжлийн бэрхшээлтэй иргэдэд зориулсан барилга барьж болно.
Авто вокзал байргүй биш байртай байсан. Энэ асуудлыг шалгуулах шаардлагыг АТГ-т хүлээлгэн өгч байна" гэв.
