Энэ жилийн Нобелийн шагнал гардуулах ёслолын ажиллагаанд Орос, Беларусь, Иран улсуудын төлөөлөгчид оролцохооргүй болжээ.
Баасан гарагт Шведийн хэсэг хууль тогтоогчид Стокхольм хотод зохион байгуулагдах энэхүү ёслолын арга хэмжээнд дээрх гурван улсын төлөөлөгч уригдвал оролцохгүйгээ мэдэгдсэн юм.
Украинд явуулж буй эзлэн түрэмгийлэх дайныхаа төлөө Орос улс, хүний эрхийг ноцтой зөрчсөн үйлдлийнхээ төлөө Иран, Беларусь улсуудын төлөөлөгчид энэхүү нэр хүндтэй олон улсын арга хэмжээнд оролцох ёсгүй гэж тэд үзэж байв.
Тэгвэл Нобелийн сан дээрх гурван улсын төлөөлөгчдөд илгээсэн урилгаа цуцлахаар болсныг Бямба гарагт зарлажээ.
Шведийн ерөнхий сайд Улф Кристерссон “Олон хүмүүсийн хүчтэй эсэргүүцэл Швед улс бүхэлдээ Оросын аймшигт дайны эсрэг, Украины талд зогсож буйг харууллаа” гэж сошиал хуудсандаа талархан бичсэн байна. Нобелийн сан хувийн эзэмшлийн байгууллага тул шийдвэрт нь нөлөөлж чадахгүйгээ тэр өмнө нь мэдэгдэж байсан юм.
Гэхдээ Стокхольм хотод болох шинжлэх ухааны салбарын Нобелийн шагналуудыг гардуулах ёслолын ажиллагаанд Орос, Беларусь, Ираны төлөөлөгчид оролцохгүй бол Норвегийн Осло хотод зохион байгуулагддаг энх тайвны шагнал гардуулах ёслолд уламжлал ёсоор бүх улсын элчин сайд нар уригдах юм байна.
Стокхольмын шагналуудыг гардуулах Шведийн хаан XVI Густавын ордны захиргаа сангийн шийдвэрийг “эерэг өөрчлөлт” хэмээн сайшаасан байна.
Нобелийн шагналтнуудын нэрсийг жил бүрийн аравдугаар сарын эхээр зарладаг. Шагналыг үүсгэн байгуулагч Альфред Нобелийн 1896 онд нас барсан өдөр болох арван хоёрдугаар сарын 10-ны өдөр гардуулах ёслол нь зохион байгуулагддаг юм.
