Өчигдөр буюу Бямба гарагт Өмнөд Солонгосын өнцөг булан бүрээс ирсэн 200,000 орчим багш Сөүл хотод эрхээ хамгаалахыг шаардаж жагссан байна.
Зохион байгуулалттайгаар хар өнгийн хувцас өмссөн багш нар Сөүлийн баруун дүүрэг дэх Үндэсний Ассемблейн ордны гадна цугларчээ.
Долдугаар сард Сөүлийн нэг бага сургуулийн залуу багш эцэг эхчүүдийн дарамт шахалтыг тэсвэрлэж чадалгүй амиа хорлосон юм.
Дараа нь Гёнги мужийн Гоянд, Умард Жолла мужийн Гунсанд тус бүр нэг багш амиа хорложээ.
Түрэмгий эцэг эхчүүдийн хэтэрсэн дарамт шахалт мэргэжил нэгтнүүдийнх нь үхэлд буруутай гэж багш нар үзсэн байна.
Тэд бас Хүүхэд хамгаалах хуулийн тодорхой заалтыг өөрчилж, сурагчдад шаардлагатай сахилгын арга хэмжээ авах эрхээ хадгалж үлдээхийг хууль тогтоогчдоос шаарджээ.
Багшийн үхлийн дараа долдугаар сарын сүүлээр Өмнөд Солонгосын засгийн газар болон эрх баригч Ардын Хүч нам сурган хүмүүжүүлэгчдийн эрхийг хамгаалах цогц арга хэмжээг авахаар болсон юм.
Энэ ажлын хүрээнд наймдугаар сарын 23-нд тус улсын боловсролын яам багш нарыг эцэг эхчүүдийн түрэмгий үйлдлээс хамгаалах төлөвлөгөөгөө танилцуулаад байгаа.
Сөүлд цугларсан багш нар Даваа гарагт бас нэг эсэргүүцлийн жагсаал зохион байгуулахаар төлөвлөжээ.
Боловсролын яам үүнийг хууль бус арга хэмжээ гэж үзэхээ мэдэгдээд оролцсон багш, сургуулийн захирлуудад хариуцлага тооцохоо анхааруулаад байна.
Үүний хариуд Солонгосын Багш, Боловсролын Салбарын Ажилтнуудын Үйлдвэрчний эвлэл боловсролын сайд И Жү Хо албан тушаалаа хэтрүүлсэн эсэхийг шалгуулахаар тус улсын авлигатай тэмцэх байгууллагад шаардлага хүргүүлжээ.
Эх сурвалж: Yonhap News
