Засгийн газар өчигдөр (2023.09.01) ээлжит бусаар хуралдаж, ЦЕГ-ын дарга Ж.Болдыг үүрэгт ажлаас нь чөлөөлсөн.
Эх сурвалжийн мэдээлж буйгаар, түүнийг өөрийн хүсэлтийн дагуу ийн чөлөөлөөд байгаа юм.
Тэгвэл, ЦЕГ-ын шинэ даргад хоёр хувилбар яригдаж буй аж.
Нэгт, ДХИС-ийн захирал П.Батбаатар.
Цагдаагийн хурандаа П.Батбаатар нь өдгөө ДХИС-ийн захирлаар ажилладаг. Хууль зүйн ухааны доктор, профессор.
2017 онд ЦЕГ-ын Тэргүүн дэд даргаар ажиллаж байсан. ЦЕГ-т удирдах албан тушаалыг олон жил хашсан нэгэн юм.
Хоёрт, Б.Асралтын оронд ГЕГ-ын даргаар түр томилогдоод байсан Р.Отгонжаргал.
Цагдаагийн хурандаа Р.Отгонжаргал нь 1975.03.15-ны өдөр Говь-Алтай аймагт төрсөн.
1993-1997 онд Цагдаагийн дээд сургуулийг Хуульч, эрх зүйч мэргэжлээр суралцаж төгсжээ.
-1997-1998 онд Сонгинохайрхан дүүргийн цагдаагийн хэлтэст эрүүгийн төлөөлөгч,
-1998-2002 онд Эрүүгийн цагдаагийн газрын Эдийн засгийн гэмт хэрэгтэй мөрдөх хэлтэст ахлах мөрдөн байцаагч, чиглэлийн ахлах мөрдөн байцаагч
-2002-2012 онд Улсын Мөрдөн байцаах газрын Эдийн засгийн гэмт хэрэг мөрдөх хэлтэст ахлах мөрдөн байцаагч, чиглэлийн ахлах мөрдөн байцаагч
- 2012-2014 онд Хан-Уул дүүрэг дэх цагдаагийн 2-р хэлтсийн дарга,
-2014-2015 онд ЦЕГ-ын Мөрдөн шалгах ажиллагаанд дэмжлэг үзүүлэх мэргэжлийн газрын дарга
-2015-2017 онд ЦЕГ-ын Тусгай ажиллагааны газрын дарга
-2017 онд Мөрдөн байцаах албаны даргаар тус тус томилогдон ажилласан.
-2017-2020 онд Цагдаагийн ерөнхий газрын Тэргүүн дэд дарга
-Хууль зүй, дотоод хэргийн сайдын 2020 оны 07 дугаар сарын 30-ны өдрийн Б/22 дугаар тушаалаар Цагдаагийн ерөнхий газрын дэд даргаар тус тус томилогдон ажиллаж байжээ.
Харин өнгөрсөн хугацаанд Гаалийн ерөнхий газрын даргын албыг түр орлон гүйцэтгэж байсан юм.
Цагдаагийн албаны тухай хуулийн 20.1-т,
Цагдаагийн төв байгууллагын даргаар цагдаагийн албанд 20-оос доошгүй жил ажилласан, эрх зүйч мэргэжилтэй, удирдах болон мэргэжлийн ажлын дадлага туршлагатай, улс төрийн албан тушаал эрхэлж байгаагүй Монгол Улсын иргэнийг дотоод хэргийн асуудал эрхэлсэн Засгийн газрын гишүүний санал болгосноор Засгийн газар томилж, чөлөөлнө гэж заасан байдаг.
Иймд ХЗДХ-ийн сайд Х.Нямбаатарын санал болгосноор, ирэх долоо хоногийн Засгийн газрын хуралдаанаар ЦЕГ-ын шинэ даргыг томилохоор байна.
