Нийслэлд үүсэж буй үер усны асуудалтай холбоотойгоор голын голдирол хааж барилга барьсан ХУД-ийн 15р хороонд байрлах "Aqua Garden" хотхоны хоёр блок барилгыг албадан нураах Нийслэлийн Засаг даргын захирамж гарсан. Тэгвэл өнөөдөр нийслэлийн удирдлагууд тус барилгын эздэд Нийслэлийн Засаг даргын захирамжийг танилцууллаа.
Харин энэ асуудалтай холбогдуулан нийслэлийн Засаг дарга Д.Сумъяабазар нийгмийн сүлжээндээ: "Голын голдиролд баригдсан Aqua garden, S'Outlets, Шунхлай ШТС-ыг буулгах ажил өнөөдрөөс эхэллээ. Эрүүл, аюулгүй орчныг нэн яаралтай бүрдүүл гэсэн мэргэжлийн байгууллагын дүгнэлтийг үндэслэн захирамж гаргасан. Мэдээж зөвшөөрөл олгосон албан тушаалтан, ААН аль алийг нь хуулийн байгууллага шалгана. Буруутай этгээдээр гарсан зардал, нөхөн төлбөрийг төлүүлнэ" хэмээн бичжээ.
Гэтэл хотын дарга Д.Сумьяабазарын "Aqua garden"-д зориулалт өөрчилж зөвшөөрөл олгосон гэрчилгээ нь ил болсон. Нэг үгээр бол хотын дарга нэг гараараа зөвшөөрөл өгчхөөд нөгөө гараараа нураах шийдвэр гаргаж байна гэсэн үг юм.
Хэрвээ буруутай этгээдээр гарсан зардал, нөхөн төлбөрийг төлүүлэх гэж байгаа бол "Aqua garden"-ний "Захиалагчдын хохирол" гэх 500 тэрбумыг төсвөөс биш өөрсдөөсөө гаргаарай д.Сумьяабазар дарга аа.
