Ардчилсан намын Үндэсний бодлогын хорооны ээлжит бус хуралдаан өчигдөр болж, Тэргүүн дэд даргаар С.Баярцогтыг томилсон.
Тэгвэл шинээр Тэргүүн дэд даргаар томилогдож буй С.Баярцогт " Манай нам хуваагдалтай байгаад учраа олохгүй нэлээн удсан. Одоо бол албан ёсоор нэгдсэн нэг нам болж төлөвшиж, даргатай, тамгатай, гэрчилгээтэй болсон байсан. Өнөөдөр бүтцийн байгууллагаа бүхэлд нь байгууллаа. Мөн дунд шатны байгууллагуудыг шинээр байгуулах журмаа баталсан. Тиймээс одоо маш хурдан хугацаанд зохион байгуулалтаа хийнэ.
Наадмын маргааш намар гэдэг шиг Ардчилсан нам одоо шууд сонгуулийн ажилдаа орох зохион байгуулалтын ажил хийгдэнэ.
Манай намын хоёр дах үе буюу дахин сэргэн мандах үе эхэлж байна. 1990 оноос хойш манай намын ардчилсан хувьсгал эхлүүлсэн хүмүүс маш идэвхтэй үйл ажиллагаагаа явуулж байгаад дараагийн үедээ шилжүүлж өгч байгаа торгон агшин байгаа. Тиймээс манай намын хувьд ардчиллын шинэ давлагаа, Ардчилсан нам шинээр төрж байна гэж ойлгож болно.
Би ямар ч шүүмжлэлийг бүтээлчээр хүлээж авдаг. Зарчмын хувьд хүчтэй өрсөлдөгч хүчтэй шүүмжлэгч байж хүчтэй улс төрч төрж гардаг гэдэг шүү дээ." гэв.