30 гаруй жилийн түүхтэй АН бараг устаж үгүй болох дээрээ тулсан байсан хэмээн АН-ын дарга Л.Гантөмөр ярьсан байна. Өнгөрсөн хугацаанд УИХ-д сөрөг хүчин нэртэй яваа энэ нам байргүй, гэрчилгээгүй, тамгагүй, хөрөнгө мөнгөгүй, дансгүй гээд үйл ажиллагаа нь үндсэндээ унасан байсныг тэрээр хүлээн зөвшөөрөв.
АН-ын дарга Л.Гантөмөр зарим сэтгүүлчтэй уулзаж асуултад нь хариулснаас товчлон хүргэж байна.
-АН-ыг ямар нэгэн сөрөг хүчнээр төсөөлөөд хэрэггүй. Намын даргын хувьд миний авсан даалгавар бол эрх баригч болох. АН өөрөө ялагчийн дүр очихгүй болохоор ялагч талаас шидсэн чулуунд бутраад байгаа юм. Ардчилсан нам өөрөө яагаад асар том стратегийн улстөрийн хүчин болж чадахгүй байна вэ. Ямар ч байсан үр хүүхэд, гэр бүлийн өмнө хариуцлага хүлээдэг залуу бол АН.
-Би бол Лувсаннямын Гантөмөр. Би хэн нэгэн олгархи, эрх мэдэлтэй хүнд хамааралгүй гэдгээ илэрхийлж өөрийгөө Лу.Гантөмөр гэж тодотгоод байдаг юм. Том бизнес хийдэггүй учраас мөнгө муутай хүн хэн нэгний халаасанд байх ёстой гэж боддог юм шиг байгаа юм. Миний итгэл үнэмшил бол улстөрд орсон бол бизнесээ боль гэдэг зарчимтай. Би 31 настай улстөрд орсон. 32 насандаа М.Энхболдод “Чиний толгой МАХН-д томдож болно, Монголын төрд жижигдэнэ” гээд хэлээд зогсч байсан залуу. 2005 онд. Энэ олон жил болоход хэн нэгэнд таны шавь больё гэх шаардлага гараагүй. Би УИХ-д тасралтгүй 3 сонгогдсон. Яг өөрийнхөө тойргоос сонгогдсон. 2008 оны сонгуулиар Элбэгдорж намын дарга байхдаа Увс яв гэсэн. Би өөрийнхөө тойрогт нэр дэвшинэ гээд С.Баяр, С.Батболдтой өрсөлдөж гарч л байсан. 2012 онд өөрийнхөө тойрогт явсан. Р.Амаржаргал гишүүнтэй хамт явсан. Үүрээд л гарч байсан. Гурав сонгогдсон учраас Монгол төрийн сайд болсон.
- Эрх чөлөөгүй, өөрөө хийгээгүй учраас бусад руу буруугаа чихдэг. Гарч байгаа хууль нь эрх чөлөөгүй, хэн нэгэнд хариуцлага тооцож чадахгүй учраас дундын болгож хаяад байна. Өнөөдөр Засгийн газар хүртэл өөрөө шийдвэр гаргаж чадахгүй байна. Засгийн газар томоохон төсөл дээр ямар шийдвэр гаргасан бэ. Шийдвэр гаргах эрх чөлөөг нь хуулиар нь хамгаалаагүй учраас айдаг. Жишээ нь, Чойжилсүрэн Засгийн газрын шийдвэрээр тэр импортын нүүрсээ авах ёстой биз дээ. Гэтэл тэр эрх чөлөө нь байхгүй учраас айж байна. Өөрөө өөрөөсөө айж байна. Тэрийг хэрэгжүүлчихвэл эрүүгийн ялтан болох гээд байна. Тиймээс хашир хотын бонд гээд хот руу чихэж байна. Тэр хүмүүст ажил хийх боломж алга. Бүх шатандаа энэ эрх чөлөө, хариуцлага гэж юмгүй болчихож. АН бол эрх чөлөө, хариуцлага гэдэг зүйлийг эрхэмлэнэ. Миний хувь хүнд ч энэ бол эрхэм зүйл. Би хэн нэгнээр удирдуулах, хэн нэгний өмнөөс шийдвэр гаргах асар дургүй. Ялангуяа би хүүхдийнхээ амьдралд оролцдоггүй. Үүний нотолгоо бол манай Ганзаяа. Шалдан нүцгэн зургаа авхуулаад дур зоргоороо амьдардаг. Хулангийнхаа үзэл санаа, эрх чөлөөнд ч халдаж болохгүй. Хулан зээл авсны төлөө намайг буруутгаж байгаа хүмүүс бол эрх чөлөөний талаар ямар ч ойлголтгүй байна гэсэн үг.
