Эквадор улсад өнөөдөр буюу Ням гарагт ерөнхийлөгчийн сонгуулийн санал хураалт зохион байгуулагдана.
Өмнөд Америк тивийн орнуудаас харьцангуй тайван амгаланд тооцогддог байсан Эквадорт энэ удаагийн сонгуулийн ажиллагаа нэлээд үймээн самуунтай өрнөж байгаа. Сүүлийн жилүүдэд гадаадын хар тамхины картелиудын ачаа тээврийн зам тус улсын нутгаар дайрах болсонтой энэ нь холбоотой.
Өнгөрсөн долоо хоногт авлигатай тэмцэх мөрийн хөтөлбөртэй нэр дэвшигч Фернандо Виллависенсио гудамжинд буудуулж алагдсан.
Түүний аллагын цаана хар тамхины бүлэглэлүүд байгаа гэсэн таамаг сэжиг яригдаж байна. Уг хэрэгт холбогдуулан Колумбын зэвсэглэсэн иргэдийг баривчилсан юм.
Тэгвэл өчигдөр буюу Бямба гарагт өөр нэг нэр дэвшигчийн байсан газрын ойролцоо буудалцаан болсон байна.
Нэр дэвшигч Отто Сонненхольцнер гэр бүлийн хамт Гуаяакил хотын нэг ресторанд хооллохоор ирж, дэмжигчидтэйгээ мэндчилэх үед буудалцаан болжээ.
“Гэр бүлийнхэнтэйгээ өглөөний цай ууж байсан газрын урд дөнгөж сая буудалцаан боллоо. Бурхны авралаар бид бүгд зүгээр өнгөрсөн ч болсон явдлыг мөрдөн шалгахыг шаардаж байна” гэж Сонненхольцнер сошиал хуудсандаа бичсэн байна.
Сүүлд Эквадорын цагдаагийн байгууллага мэдэгдэлдээ рестораны ойролцоох спорт хувцасны дэлгүүрт гарсан дээрмийн үеэр буудалцаан болсныг тайлбарлажээ.
Энэ үеэр таван хүнийг баривчилсан байна.
Чөлөөт зах зээлийг дэмжих мөрийн хөтөлбөртэй Сонненхольцнерын хувьд Виллависенсиогийн аллагын дараа хэрвээ сонгогдвол гэмт хэрэгтнүүдтэй ширүүн тэмцэхээ амлаж эхэлсэн юм.
Пүрэв гарагт өөр нэг дэвшигч Даниэл Нобоа тус улсын Дуран хотод сонгуулийн кампанит ажил явуулах үеэрээ галт зэвсгийн халдлагад өртсөнөө мэдээлсэн.
Гэхдээ цагдаа нар буудалцаан Нобоад чиглээгүй байсныг сүүлд тайлбарласан юм.
Баасан гарагт Эквадорын далайн эргийн Ла Либертад хотын захирагч Франциско Тамариз гэргийн хамт зорчиж явсан автомашин руу нь цагдаа нар гал нээсэн тухай мэдээлжээ. Сүүлд орон нутгийн цагдаагийн алба тайлбарлахдаа ямар нэг таних тэмдэггүй, хуягласан гурван автомашины цуваа зогсох шаардлагыг хүлээж аваагүй тул галт зэвсэг хэрэглэснээ мэдээлсэн байна.
Энэ үеэр зогсоосон нэг автомашинаас гурван хүнийг баривчилж, зөвшөөрөлгүй хоёр галт зэвсэг хурааснаа бас мэдээлжээ.
Тамариз энэ асуудлаар Эквадорын ерөнхий прокурорын газарт гомдол гаргахаа мэдэгдээд байгаа
Далайн эргийн Манта хотын захирагч Агустин Интриаго өнгөрсөн сард бусдын гарт алагдаж байв. Уг аллагатай холбогдуулан дөрвөн сэжигтнийг баривчилснаа Эквадорын цагдаагийн газар Баасан гарагт мэдээлжээ.
18 орчим сая хүн амтай Эквадор улс Өмнөд Америк тивийн баруун хойд эрэгт оршдог. Газрын тос, хөдөө аж ахуйн экспортоос эдийн засаг нь гүнзгий хамааралтай. Дундаж орлоготой энэ улсын хүн амын дөрөвний нэг нь ядуу нөхцөлд амьдардаг байна.
Эх сурвалж: Reuters
