Нийслэлийн Засаг дарга бөгөөд Улаанбаатар хотын захирагч Д.Сумъябазар Aqua garden, S.Outlet, Шунхлай ШТС-ын барилгыг буулгахаа өнөөдөр дахин мэдэгдсэн.
Тэрбээр энэ талаараа "Энд хүний өмч хөрөнгөтэй холбоотой асуудлыг хөндөж байна гэх байх. Гэхдээ үгүй.
Бүхэл бүтэн хороо үерт автах тооцоолол гарч, үер ус, аадар борооны хэмжээ хоёр дахин нэмэгдэж байгаа энэ цаг үед иргэд ээ голын эрэг дээр баригдаж байгаа барилга орон сууцанд битгий орооч.
Тэнд орохдоо 100 хувь мөнгөө төлсөн бол тэр хэмжээгээр хохирол амсана. Мөн эд хөрөнгө, хамгийн үнэтэй зүйл болох амь насны асуудал яригдана.
Тэр барилга байгууламжид нь суулт үүсэж, далийж, нурвал яах вэ. Энэ бол иргэдээ, эд хөрөнгийг нь хамгаалж байгаа асуудал. Ирээдүйд үүсэх хор хохирлын эрсдэлийг багасгаж байгаа явдал" хэмээн тайлбарлалаа.
