Төрийн хэмнэлтийн хуулийн хүрээнд төрийн болон төрийн өмчит байгууллагын эзэмшлийн тээврийн хэрэгслийн улсын дугаарын дэвсгэр өнгийг цэнхэр болгох талаар ЗТХ-ийн сайд С.Бямбацогт мэдээлэл хийлээ.
Одоогийн байдлаар дипломат консулын машин улаан, цахилгаан машин бол ногоон, нийтийн тээвэр бол шар, технологийн тээврийн хэрэгсэл хар дэвсгэртэй улсын дугаартай байдаг. Үүн дээр төрийн машинууд цэнхэр дэвсгэртэй улсын дугаартай болж нэмэгдэж байгаа аж.
Энэ талаар ЗТХ-ийн сайд С.Бямбацогт "Хичээл эхлэхээс өмнө төрийн болон төрийн өмчийн эзэмшлийн бүх автомашины улсын дугаарын дэвсгэр өнгийг цэнхэр болгоно. Төрийн машиныг ашиглан дарга нар хүүхдээ цэцэрлэгт зөөдөг, эхнэр нь дэлгүүр хэсдэг, хөдөө гадаа зугаалдаг, орой үдэш баар хэсдэг гэх шүүмжлэл гардаг. Дугаарын дэвсгэр өнгийг сольсноор ард түмэн төрийн машин хаана юу хийж явааг мэддэг болно. Мөн машины дугаар дээр QR код байршуулна. Ингэснээр төрийн аль байгууллага, ямар даргын машин болохыг QR код уншуулан мэддэг болох юм. Улсын дугаарын дэвсгэр өнгийг цэнхэр болгосноор замын түгжрэлийг ч багасах боломжтой.
Нийт 5300 орчим суудлын машин, 2100 гаруй ачааны машин төрийн эзэмшилд байна. Үүнээс тодорхой хувь нь хөдөө орон нутагт бий. ЗТХЯ-нд бүртгэлтэй 1200 орчим машин бий. Энэ машинуудын дугаарыг хамгийн хямд зардлаар солино. Монгол Улсад 40 гаруй дугаарын үйлдвэр бий. Үүнээс хамгийн бага үнийн санал ирүүлснийг манай яам шалгаруулаад дугаараа солино. Бусад яамдыг ч үүнд уриалж байна" гэлээ.
