Туркменистан улс өөрийн нутаг дэвсгэрт байгаа хоолойг ашиглан Хятадад байгалийн хий нийлүүлэх "Хийн холбоо" байгуулах Москвагийн саналаас татгалзсан байна. Туркменстан-Хятадын хийн хоолойн гурван салбар бүгд Туркменистан, Казахстан, Узбекистанаас олборлосон хийг дамжуулж байгаа талаар мэдээнд дурджээ. ОХУ, Казахстан, Узбекистаныг оролцуулсан "Гурван талт хийн холбоо" байгуулах санал тавиад байсан аж.
ОХУ-ын Эдийн засгийн хамтын ажиллагааны газрын захирал Дмитрий Биричевский "Хийн салбарт гурван талын хамтын ажиллагааг өргөжүүлэх боломжийг Москва үгүйсгэхгүй бөгөөд бусад улс орнууд ч сонирхож байгаа”хэмээсэн байна.
“Биричевскийн мэдэгдэл дор хаяж хэд хэдэн асуултыг төрүүлж байна" гэж "Туркменгаз" төрийн компанийн орлогч дарга Мирад Арчаев хэлэв.
Тэрээр “Одоогийн байдлаар Туркменистан-Хятадыг холбосон хийн хоолойн гурван салбар тус улсын зүүн болон зүүн өмнөд хэсэгт орших Туркмен ордуудаас хий нийлүүлж байна. Гурван шугам, тэдгээрийн ашиглалтыг хангах үйлдвэрлэлийн хүчин чадлыг зөвхөн Туркменгаз болон Хятадын газрын тос, байгалийн хийн CNPC компани Туркмен, Хятадын талууд хамтран тохирсон. Хоолойгоор дамжуулан бусад улс орнуудаас хий нийлүүлэхийг тооцоолоогүй бөгөөд Туркменстан-Хятадын хоолойн төслийн оролцогчдын жагсаалтыг өргөжүүлэх төлөвлөгөө нь одоогийн хийн хэмжээ түгээх төлөвлөгөөнд тусгагдаагүй” гэжээ. Түүнчлэн Туркменистан Оросын мэдэгдлийг "Олон улсын эрх зүйн хэм хэмжээ, байгалийн хийн салбарын үйлдвэрлэлийн практикаас хазайсан" гэжээ.
