Энэтхэг улсын хөнгөлөлттэй зээлийн хөрөнгөөр барьж буй Газрын тос боловсруулах үйлдвэрийн “Устөрөгч үйлдвэрлэх байгууламж”-ийн лиценз эзэмшигчээр Италийн “Кинетикс Техноложи” (Kinetics Technology) компани шалгараад байна. Тус компанитай төсөл хэрэгжүүлэгч “Монгол газрын тос боловсруулах үйлдвэр” ТӨХХК, төслийн менежментийн зөвлөх БНЭУ-ын “Инженерс Индиа Лимитед” (Engineers India Limited) компанийн удирдлагууд Лиценз эзэмшигчийн гэрээнд гарын үсэг зурлаа.
Монгол Улсад барьж буй Газрын тос боловсруулах үйлдвэр нь үндсэн технологийн 12 байгууламжаас бүрдэнэ. Атмосферийн болон Вакуум нэрлэгийн, хөнгөн фракцийг ялгах зэрэг гол байгууламжуудаас гадна гадаадын газрын тос, байгалийн хийн салбарын томоохон корпорациудын патенттай, гүн боловсруулалтын 7 байгууламжтай байх юм. Эдгээр 7 байгууламжийн лиценз эзэмшигчдийн дунд явуулсан тендерт АНУ-ын болон Баруун Европын нефть-химийн салбарын концернууд шалгарч, гэрээ байгуулж эхлээд байна.
Газрын тос боловсруулах үйлдвэрийн хэд хэдэн үйл явц нь устөрөгчтэй орчинд явагддаг учир технологийн процессийг устөрөгчөөр хангах энэхүү байгууламж нь үйлдвэрийн чухал бүрэлдэхүүн хэсэг юм. “Кинетикс Техноложи” компани нь 30 гаруй оронд салбартай, олон төрлийн технологийн лицензийн зохиогч болон эзэмшигч, дэлхийн газрын тос, байгалийн хийн салбарын томоохон төлөөллийн нэг аж. Тус компанийн боловсруулсан зураг төслийн дагуу Газрын тос боловсруулах үйлдвэрийн Устөрөгч үйлдвэрлэх байгууламжийг барих юм.
