Сэлэнгэ аймгийн Мандал сумын ИТХ-ын 20 дугаар хуралдаан өчигдөр /2023.08.14/ болжээ.
Хуралдаанаараа Мандал сумын 14 өрхийн 30 иргэний амь насыг үерээс аварч хамгаалаад өөрөө амь эрсэдсэн талийгаач Л.Даваажаргалын ар гэрт нэг удаагийн тэтгэмж олгох тухай асуудлыг хэлэлцсэн байна.
Улмаар энэ оны төсөвтөө тодотгол хийж, талийгаачийн ар гэрт хөдөлмөрийн хөлсний доод хэмжээ болох 550 мянган төгрөгийг 60 сараар бодож 33 сая төгрөг эхний элжинд олгохоор шийдвэрлэсэн байна. Үлдэгдлийг нь ирэх оны төсөвт суулгаж байгаад олгохоор болжээ. Мөн бусдыг амийг аврах ажилд оролцож явахдаа унаж байгаад осолдсон тээврийн хэрэгслийнх нь үнэлгээг хийлгэж байгаа аж.
"Хүний алтан амийг эд мөнгөөр үнэлж болохгүй. Гэхдээ нутгийн удирдлагын зүгээс ар гэрт нь жаахан ч атугай нэмэр болох үүднээс ийм шийдвэр гаргалаа" гэдгийг Мандал сумын Засаг дарга А.Дашзэвэг онцлон хэллээ.
Түүнчлэн:
- Сумын 2023 оны төсөвт тодотгол хийх тухай
- Суманд 2024 онд аймгийн орон нутгийн хөгжлийн сангийн хөрөнгөөр хэрэгжүүлэх хөтөлбөр, төсөл арга хэмжээний саналын тухай
- “Сумын нутаг дэвсгэрийн хөгжлийн төлөвлөгөө”-ний эцсийн шатны төлөвлөлтийн тайлангийн тухай
- Газрын зориулалт өөрчлөх болон суурьшлын бүсийн тэг гортигийг тогтоох тухай зэрэг асуудлыг хэлэлцсэн байна.
