Жэнко Х.Баттулга Монголын ардчилсан холбооны газрыг 23.2 тэрбумын барьцаанд тавьжээ. Энэ уг нь шинэ мэдээлэл биш. Оны дараахан олонд хүрсэн мэдээлэл. Гэхдээ хэрэг хуучирдаггүй гэдгийг сануулах гэсэн юм. Тэгээд ч Хөгжлийн банкны асуудлаар байгуулагдсан УИХ-ын Түр хороон дээр энэ асуудал хурцаар яригдаж байгаа юм билээ. Хөгжлийн банкнаас их хэмжээний зээл авсан компаниудын жагсаалтад "Пирамид орд" гэж компани байгаа. Тус компани Хөгжлийн банкнаас 2018 оны зургадугаар сарын 19-нд "Буман залуус" нэртэй 296 айлын орон сууц барина хэмээн 15 тэрбумын зээл авсан байна. Хамгийн хачирхалтай нь энэхүү зээлийнхээ барьцаанд Сүхбаатар дүүргийн 10 дугаар хорооны нутаг дэвсгэрт байрлах 10 мянган ам метр талбайг барьцаалсан байдаг. Энэ 10 мянган ам метр талбай гэдэг нь Монголын ардчилсан холбооны байр байрлаж байгаа, тус холбооны мэдлийн газар юм.
Учрыг тодруулахад, тухайн үед Монгол Улсын Ерөнхийлөгчөөр ажиллаж байсан Х.Баттулга Хөгжлийн банканд албан бичиг гаргаж өгч, МоАХ-ны газрыг барьцаанд тавиулжээ.
За тэгээд өнөө зээлсэн мөнгөөрөө орон сууцны дөрвөн блок барьсан аж. Хоёр блок нь 2019 оны намар ашиглалтад орсон, үлдсэн хоёр блокийг нь Улсын комисс хүлээж аваагүй. Энэхүү "Буман залуус" гэгч хорооллын барилгууд нь маш чанаргүй баригдсан, оршин суугчдадаа ордер буюу гэрчилгээг нь гаргаж өгдөггүй гэх мэт хэл ам, хэрүүл тэмцэл ихтэй байгаа. Байр захиалж, худалдан авсан иргэд, оршин суугчдаа ийнхүү хохироож байгаагийн зэрэгцээ уг хорооллыг барьсан, өөрөөр хэлбэл "Буман залуус" гэгч хорооллын гүйцэтгэгчээр ажилласан "Бесон" ХХК шүүхэд хандаж "Пирамид орд" ХХК-иас 5.3 тэрбум төгрөг нэхэмжлэн, шүүх, цагдаад хандаад байгаа ажээ. Энэ нэхэмжлэлээс болж прокуророос "Пирамид орд" компанийн хөрөнгийн шилжилт, хөдөлгөөнийг хязгаарлаад буй гэнэ.
Энэ их хэл ам, хэрүүл тэмцэл, зарга заалхайд баригдсан тус компаниас Хөгжлийн банк зээл, зээлийн хүү нийлсэн 23.2 тэрбум төгрөгөө салгаж авна гэдэг маш хүнд болжээ. Магадгүй энэ зээлийн зохих төлбөрт нь Монголын ардчиллын холбооны мэдлийн газрыг улсад хураан авч ч мэднэ. Тийм зүйл болохгүй л гэж найдахаас өөр арга алга.
Хөгжлийн банкны зээлийг улс орны хэмжээний үр ашигтай, хөгжлийн төсөлд биш хувийн компанийн орон сууцны барилгад олгуулж, тэгэхдээ Монголын ардчиллын үе үеийнхний ажиллаж, амьдарч байсан гал голомт Монголын ардчилсан холбооны байр Ардчиллын ордон байрлаж буй газрыг барьцаанд тавьсан зэрэг нь Женко Баттулгын хутгасан жонхуу гэдэг нь тодорхой болсон.
Ерөнхийлөгчөөр ажиллаж байхдаа НҮБ-ын Ассамблейн чуулганд ганц ч очоогүй атлаа улс орноо ШХАБ хэмээх Шанхай төвтэй улс төрийн ломбарданд тавих гэж зүтгэж байсан Х.Баттулга Монголын ардчилсан холбооны газрыг банкны барьцаанд тавихдаа сэтгэл эмзэглэж, санаа зовоогүй ажээ. Ийм хүн Ардчилсан намыг "Женко тур" компанийнхаа салбар шиг болгож, Монголын ардчиллыг булшлах гэж зүтгэж байгааг ойлгож ядах юм алга.
Эх сурвалж: https://www.facebook.com/groups/454138328011055/posts/5114149678676540/ https://www.facebook.com/kharsuld.khiimori/posts/pfbid02s6otMqHWVBteo2Xyx89z8kb5D4hwn6oXWnv9SKSSX1D4s66nXkEKjcNF3otRpSMUl