Украин: Путин Оростоо 10-15% дэмжлэгтэй болжээ...

Украинд Оросын цэргийн тусгай ажиллагаа 18 дахь сардаа явагдаж байгаатай холбогдуулан мэдээллийн тэнцвэртэй байдал хангах үүднээс украины Freeдом ТВ, 24 Канал ТВ, Украины ЕТГ-ын зөвлөх Михаил Подоляк, Оросын Төрийн Думын экс-депутат Мария Максакова, экс-депутат ардчиллын төлөө тэмцэгч Марк Фейгин, оросын эрдэмтэн Станислав Белковский, КГБ, оросын гадаад тагнуулын экс-хурандаа Сергей Жирнов нарын ярьснаас түүвэрлэн орчуулж сонирхуулъя. Энд sonin.mn сайтын байр суурь тусгагдаагүй болно. ОХУ-ын эрх баригчид НҮБ-ын Дүрэм, олон улсын хууль зүй, мораль ёс зүйг ОХУ-ын Үндсэн хуулийн дор оруулчихсан. Дмитрий Песковын ярьж байгаагаар нутаг дэвсгэрээ тэлэх оросын аппетит их даруухан, Украины 4 муж ба Крымыг ОХУ-ын Үндсэн хуульд оруулж бичээд баталгаажуулчихсан учраас тэр 5-ыг буцааж өгөхгүй гэж л байлдаж байгаа болохоос Украины бусад хот, муж хэрэггүй гэжээ.  

Путин ба түүний хүрээллийнхэн украинчуудын эсэргүүцлийн түвшин, барууныхны нэгдсэн эсэргүүцлийг даан ч тооцсонгүй нь стратегийн хамгийн том алдаа болжээ. “Бүх Украин бидний эсрэг босоод ирнэ гэдгийг Путин даан ч тооцсонгүй, иймээс СВО (цэргийн тусгай ажиллагаа) нь дампуурлаа” хэмээн оросын тавиул Олег Царев хүлээн зөвшөөрөв. Ялдаг ч бүр дүүрчээ. Харин ч оросын энэхүү түрэмгийлэл нь НАТО-г эвлэлдэн нэгдэж нягтруулан, НАТО-г бүр тэлүүлэн Оростой шууд хиллүүлж, “Умард урсгал”-ын экспортын бүх орлогоо хаалгаж, эцэст нь Орос орноо, Оросын аугаа ард түмнийг соёлт хүн төрөлхтөний шившиг болгож, соёлт Европоос хөөлгөжээ. Путины хамгийн сул тал нь юу вэ гэдэг нь бүтэн жил хагасын СВО буюу цэргийн тусгай ажиллагааных нь дараа нэн тодорхой боллоо. Хэн ч зоригтой хэлж чаддаг боллоо. Тэр нь юу вэ гэвэл их дайны стратегийн төлөвлөлт гэж ёстой нойл зааж байна. Кремльд ч, Оросын БХЯ-нд ч, Жанжин штабт ч мөрөн дээрээ том гоё цолтой, энгэртээ даахгүй олон одон тэмдэгтэй генерал, түшмэд их дайнд урагшлах ямар ч төлөвлөгөө, төсөл, арга ухаан, тактикаар мад суулаа. Дайны тухай төсөөлөл нь тун болхи бөгөөд гэнэн. Орост тэр нь бүр итгэлтэй, нийгэм нь яг тэгнэ гэсэн ойлголттой. Ганц Украин гэлтгүй, хуучин Зөвлөлт Холбоот Улсын аль ч БНУ руу оросын цэрэг явж ороход оросын армийг цэцгийн хэлхээ, цэцгийн баглаа, талх давс угтана, “тусгай операц”-ыг максимум нэг сар хагас байхаар төлөвлөнө. Цаашаа дан найрамдал, ахан дүүс, Оросыг тойрч нягтарсан шинэ СССР буй болно. ОХУ-д энэ үлгэрт нь итгэдэг хүн цөөнгүй бий. Оросын ард түмнийг итгэж үнэмшүүлдэг бас нэг үлгэр нь Зөвлөлтийн Улаан армийн бүх гавьяаг Оросын армид авч наачихаад тэр түүхээр өнөөгийн түрэмгийллээ зөвтгөх тактик. Тийм учраас СВО нь яаж ийгээд дэмжигдээд өнөө хүрчээ.  “Оросын эрх чөлөө” легион Москва хот руу аян дайн хийхээ зарлалаа. Хүн амын дэмжлэг хэрэгтэй. Гэтэл ОХУ-ын иргэдийн дунд Путины фанатууд бас байна. Ихэдлээ ихэдлээ гэхэд Орос дахь дэмжигчид нь 10-15% гэсэн социологийн судалгаа легионоос хийжээ. Энэ 10-15% бол оросын нийгэм дэх дайны талынхан, цаана нь 10-15% нь дайныг үзэн ядагчид, Украинаас цэргээ гаргахыг шаардагчид, үлдэх 70% - энэ бол конформистууд. Эд бол шийдэх хүмүүс биш. Зүгээр л мэдэн будилаад сууж байгаа иргэд. Зурагт юу гэнэ, яг түүнийг тоть шиг давтана. Крым манайх гэвэл манайх юм байнаа л гэж ойлгоно. Хэрэв оросын зурагтаар маргааш Путиныг цэргийн гэмт хэрэгтэн, түүнийг Хаага руу илгээх ёстой гэвэл үнэхээр тийм, цаг нь болсон гэж хэлэхээс буцахгүй. 

Оросын иргэдийн ихэнхи нь өөрийн гэсэн байр суурьгүй байна. Тэдний хувьд Путины альтернатив өөр нэг хүчийг л хүснэ. Вагнерыг Ростов яаж уухайлан угтаж сүйд боллоо, яг түүн шигээ Легионыг угтаж таарна. Тэгэхдээ Вагнерыг уухайлсан тэдгээр хүмүүс л Легионыг баярлан угтана. Орос бол маш хатуу цагдаагийн улс учраас хүмүүс ямар ч үйл ажиллагаанд бэлэн биш. Идэвхгүй. Хүмүүс өөрчлөлтийг хүсч байна, тэгэхдээ үүнийхээ төлөө тэд юу ч хийж чадахгүй ба хийхийг хүсэхгүй. Эрх баригчдыг эсэргүүцэх хүч гараад ирвэл дэмжинэ, үг дуугүй талд нь орно.  Крым руу Украины зэвсэгт хүчин явж ороход л Орост захиргаа удирдлагын коллапс эхэлнэ. Иймд “Оросын эрх чөлөө” легион Москва хот руу аяндаа бэлтгэх хэрэгтэй. Тэр цаг тулгартал Легион хүчээ нөөцлөх болно. Орост маш олон хүмүүс бидэнтэй ирж нийлнэ, учир нь Путины дэглэмд сэтгэл дундуурчууд маш их болж байна. Хүчнийхэн ч дээрээс өгөх тушаалыг дагахгүй аргацаах байдал руу шилжлээ. Украин руу үр хүүхэд, эр нөхөр, ах дүүгээ явуулаад оронд нь ууттай шарил хүлээн авсан оросын айл болгон Путиныг далдуур зүхэж байгаа. Тэд  Крымээ алдахыг Путинээс хүлээж байна. Крым чөлөөлөгдөөд маргааш нь Орост бужигнаан эхэлнэ хэмээн “Оросын эрх чөлөө”-ний сайтад бичжээ. Оростой (ялангуяа Путинтэй) энхийн хэлэлцээ хийж болохгүйн үндсэн шалтгаан нь дээрхи тэнэг төсөөллөөс нь урган гарна. М.Подоляк ярьж байна. Ямар ч ял зэмлэлгүйгээр  украинчуудыг алж устгаж, террордож байгаагаа зөвтгүүлэх, СВО явуулахад хүргэсэн гол буруутан гэж өөрсдөөр нь хүлээн зөвшөөрүүлэх, тэгээд Киевт оросын тал баримтлагч, хэзээ ч Оросоос үл урвагчдын тоглоомын нам, улс төрчдийг төрийн эрхэнд гаргах гэх мэт шаардлага тавьчихлаар Украин хэлэлцээ хэзээ ч хийхгүй гээд гүрийгээд, үзэлцээд, зөвхөн байлдааны талбарт ялж байж, Украины нутаг дэвсгэрээс оросын цэргийг бүрэн гаргаж байж хэлэлцээ хийвэл хийнэ гэсэн байр суурьтай байна. ОХУ нь ялахгүй байгаа хэрнээ Украиныг буулгаж авах төлөвлөгөөгөө хэзээ ч орхихгүй. Гэтэл одоо Украинд юу болж байна, юу харагдаж байна. Оросын арми фронт дээр ялах нь бүү хэл, эзлэн авсан байрлалаа алдчихгүйн тулд үхэн хатан, сэтгэл санааны нэн хүнд уналтад байлдсан нэр зүүж байна. Оросын дайны машин складаас склад дамжин нөөцөлсөн хамаг техникээ дайчлан амьд хүний олон, АК бууны олон, сум гранатын олноор цөхөртлөө зууралдан байлдахаас өөрөөр цэргийн урлаг, авьяас, хатан зориг энэ тэр гэж огт байхгүй болсон. Оросын армид 14 мянган танк байснаас байлдаанд оролцуулахад яг бэлтгэсэн нь 4000, гэтэл одоо тэдгээрээ алдаад дууссан. 2022 оны хавраас хойш танкийн тулалдаан ганц ч хийсэнгүй. “Уралвагон” завод нь сардаа 20 танк үйлдвэрлэх буюу сэргээн засварлана. Ихэнхи нь хуучин загварынх. Иймд хүний олноор довтлох “махан шуурга” гэх тактик хэрэглэхээс өөрөөр байх арга алга. Олзлогдох, алагдах, фронтод эргэж очихгүйгээр үүрдийн зэрэмдэг болох магадлал нэн өндөр. Оросын арми томхон масштабын давшилтын ажиллагаа явуулах ямар ч бололцоогүй болсон. Нөөц хүчээ бүх чиглэлд байршууллаа. Тэд нь маш олуулаа, өөр гэгээтэй юм алга. Одоо Купянскийг 2-р Бахмут болгохоор 100 мянган цэрэг бөөгнүүлэн зууралдан үхэлдэнэ. Хүн хүчний тоогоор олон дахин давуу оросын армийг ялагдуулах замд оруулсныг гайхан биширсэн, магтсан оросын блогерчид олон гараад иржээ. “Украинчууд аа, Та нар дэлхий дахиныг гайхшрууллаа! Тэнгэр тэтгэг! Украины яруу алдар!”...гэхчлэн.  

Путин оргон зайлахад бэлтгэв, чемоданаа төхөөрч байна гэсэн мэдээлэл зарим сайтуудад явж байна. Украины арми өөрөөсөө хэт ахадсан ачаа үүрч, чадахгүйдээ гэсэн болгоныг чадаж стратегийн санаачилга гартаа авсан тухай мэдээлэх тусам Кремлийн эрх баригчдын хувь заяа хэрхэх бол гэсэн элдэв таавар таамаглал нийгмийн сүлжээнд тархана.  Хатагтай М.Максакова Путины орголтыг ингэж зөгнөжээ. Венесуэл руу гэсэн төлөвлөгөө бий, гэхдээ кремлийн лидерийн аюулгүй байдлыг яг хангаж чадахгүй, Куба байж болно, Путин Кубад их хайртай. Гэхдээ аль алин нь хэлэлцэн тогтсон юмгүй. Венесуэлд Чавесаа залгамжлаад Мадуро гэх узурпатор оршиж байна, гэтэл олон улсын хамтын нийгэмлэг Хуан Гуайдог Ерөнхийлөгч гээд хүлээн зөвшөөрсөн, хоёр Засгийн газартай, тэгэхлээр манай дарангуйлагчид аюулгүй байдлын баталгаа алга, кубууд энэ нөхрийг халуун элгэндээ тэврээд авах нь юу л бол? Путин Африк руу зугтааж очих тухай цуурхал тархсан. Вагнерын толгойлогч Пригожин Путиндээ зориулж ТАБНУ-д тусгай цайз бэхлэлт бүхий орд харш бариулсан дуулдсан. С.Жирновын таамгаар 10 дугаар сард Хятадад “Бүс ба Зам” олон улсын дээд түвшний уулзалтад Путин уригдсан, урилгын дагуу очоод тэндээ үлдчих магадлал бас бий. Улс төрийн цагаачлал гэхгүйгээр өвчнөө эмнүүлнэ гэдэг ч юм уу, эсвэл Хойд Солонгос гэж нөөцний хаалттай нэг улс байна, Туркэд айлчилна гэж зарласан, тэнд бас хувилбар байж болно гэхчлэн ярьжээ. Гэхдээ нэгэнтээ дайны гэмт хэрэгт нэрээ мандуулчихсан дарангуйлагчийг хүлээн авах улсыг олоход тун хүнд гэсэн үг өгүүлбэр явж байх юм.                             Орос, англи хэлнээс түүвэрлэн хөрвүүлсэн Дүгэржавын Номиндарь