БНАСАУ-ын удирдагч Ким Чен Ун зэвсэгт хүчний ангиудыг пуужингаар тоноглох түвшинг нэмэгдүүлэхийн тулд тэдэнд зориулсан тактикийн пуужин, хөөргөх төхөөрөмжийн үйлдвэрлэлийг нэмэгдүүлэх тушаал өгсөн тухай БНАСАУ-ын Төв цахилгаан мэдээний агентлаг мэдээллээ.
Ким Чен Ун тактикийн пуужингийн үйлдвэртэй танилцаж тэдгээрийн үйлдвэрлэлийг нэмэгдүүлэх зорилт тавьж байгаагаа мэдэгджээ. Мөн тэрээр тактикийн пуужингийн харвах төхөөрөмж үйлдвэрлэдэг үйлдвэрүүд болон байлдааны хуягт машин, пуужингийн их бууны системийн үйлдвэрүүдтэй танилцах явцдаа тэдгээрийн үйлдвэрлэлийн хэмжээг нэмэгдүүлэхийг үүрэгдсэн байна.
"Нөхөр Ким Чен Ун хэлэхдээ, дайснууд бидний эсрэг зэвсэгт хүч хэрэглэж зүрхлэхгүй байхын тулд арми ямар ч үед ямар ч дайн хийхэд бэлэн байх ёстой бөгөөд бидэн рүү дайрсан тохиолдолд тэд гарцаагүй ялагдах болно" хэмээн дурдсаныг тэмдэглэжээ.
“Ройтерс” агентлагийн мэдээлснээр, Өмнөд Солонгос, АНУ хоёр хамтран 8-р сарын сүүлчээр Хойд Солонгосын цөмийн болон пуужингийн заналхийллийн эсрэг хариу арга хэмжээгээ сайжруулах сургуулилт хийнэ.
Солонгосын хойгийн ойролцоо Вашингтон, Сөүл хоёрын хийж буй сургуулилтыг Умард Солонгос удаа дараа “цөмийн дайны сургуулилт”, БНАСАУ-ын эсрэг өдөөн хатгалга гэж нэрлэсээр ирсэн.
Өнгөрөгч долдугаар сард БНАСАУ пуужин хөөргөсөн бөгөөд урьдчилсан мэдээллээр энэ нь баллистик пуужин байв.
Эх сурвалж: RBC.ru
