- Хавай аралд мягмар гарагаас хойш ой хээрийн түймэр гарч байна
- Улмаар амиа алдагсдын тоо 90 давав
- Арлын оршин суугчид жуулчдыг арал руу хийх аяллаа цуцлахыг хүсжээ
Хавай аралд дэгдсэн ой хээрийн түймрийн улмаас 90 гаруй хүн амиа алдаж, арлын нутаг дэвсгэр ихээхэн хохирол амсаад байгаа юм. Улмаар жүжигчин Jason Mamoa жуулчдыг Мауй арал руу зорчихгүй байхыг уриалжээ.
Aquaman, Game of Thrones зэрэг киногоороо алдартай тус жүжигчин Хавай арлын уугуул иргэн юм. Тэрбээр цахим хуудсандаа “Одоогоор Мауй арал та бүхний амрах газар биш. Тийшээ зорчихгүй байхыг хүсье” хэмээн нийтэлсэн байна.
Мауй арлын оршин суугчид “Арлын иргэд амь тэмцэн түймрээс зугтаж, нөхцөл байдал хүнд байна. Харин жуулчид энд зүгээр л сэлж байна. Ямар ч Хавайн иргэн ийм нөхцөл байдлын дараа юу ч болоогүй юм шиг ингээд сэлэхгүй байсан” хэмээн ВВС-д өгсөн мэдэгдэлдээ дурджээ.
Оршин суугчид Мауй аралд ирсэн, цаашид ирэх жуулчдаас шаардлагагүй аяллуудаа цуцлах хүсэлт тавьжээ. Гэвч жуулчдын тоо буурах нь Хавай арлын эдийн засагт томоохон хохирол учруулах үйлдэл болох юм.
