Сэтгүүлч А.Шинэбаяр өнгөрсөн амралтын өдрүүдэд Нийслэлийн Засаг даргатай холбоотой цахим хуудсанд мэдээлэл хийсэн нь олны анхаарлыг татсан юм.
Тэрээр "Нийслэлийн Засаг дарга Д.Сумъяабазар долоо хоногийн өмнө согтуу машинтайгаа явж байгаад дугуйтай явсан залууг дайрч унагаж хүнд гэмтээсэн. Гэтэл энэ ослын талаарх мэдээлэл нь хав дарагдаад байна. Ямар ч мэдээллийн хэрэгсэл мэдээлэхгүй байна. Хүн бүхэнд хууль тэгш үйлчлэх ёстой. Хотын дарга нь согтуугаар жолоо барьж, ажлаа тараад явж байсан гэмгүй иргэнийг дайрчихаад гэмтэл дээр ч очоогүй байсан. Хүний үнэр байсан бол ядаж гэмтэл дээр очоод биеийн байдлыг нь асуух байсан биз дээ. Энийг яагаад шалгахгүй байгаа юм бэ" хэмээсэн юм.
Харин Нийслэлийн Засаг даргын тамгын газрын хэвлэлийн төлөөлөгч Н.Сугар тус асуудалд хариу өгсөн бөгөөд тэрээр "Илт худал мэдээлэл түгээж байна. Хуулийн байгууллагаас тодруулж, мэдээлэл дамжуулахыг хүсье. Бусдыг гүтгэх, нэр төрд халдах нь хуулийн хариуцлага хүлээх үндэслэл болно гэдгийг сэтгүүлч хүн мэдэж баймаарсан. Хотын даргын хувьд согтуугаар тээврийн хэрэгсэл жолоодоогүй, осол гаргаагүй." хэмээсэн юм.
