Орос улс бямба гарагт Украиныг Керчийн гүүр рүү дор хаяж хоёр удаа пуужингаар довтолсон гэж буруутгав. Гүүрний ойролцоо хэд хэдэн дэлбэрэлт сонсогдсоны дараа утаа бүрхжээ. ОХУ-ын эрх баригчид Украины харвасан пуужингуудыг устгасан, гүүр эвдрэлгүй, зорчих хөдөлгөөнийг сэргээсэн гэж мэдэгдэв. Харин Украины тал нөхцөл байдлын талаар тайлбар хийгээгүй байна.
Түүнчлэн Крымийн тэргүүн Сергей Аксенов гүүрний хэсэгт дайсны хоёр пуужинг харвасан гэжээ. Үүний зэрэгцээ Крымыг ОХУ-тай холбосон Крымын гүүрний хөдөлгөөнийг хоёр чиглэлд хэсэг хугацаанд хаасан байна.
Дараа нь ОХУ-ын Батлан хамгаалах яам цохилтыг зенитийн S-200 пуужингаар хийсэн гэж мэдэгдсэн.
Орон нутгийн цагаар 16:00 цагийн орчимд Орос Украины өөр нэг пуужинг устгасан гэж мэдэгдэв. Гэхдээ хэсэг хугацааны дараа гүүрэн дээрх хөдөлгөөн сэргэсэн ч ойр орчимд нь урт түгжрэл үүсчээ.
Албан ёсны телеграм сувагт 17:00 цагийн байдлаар Оросын Таманы талаас 561, Керчийн талаас 711 тээврийн хэрэгсэл гүүрэн дээр түгжирсэн байдалтай байгааг дурджээ.
8-р сарын 4-нд Оросын "Сиг" танк хөлөг онгоц Керчийн хоолойд далайн нисэгчгүй онгоцонд өртсөн. Түүнчлэн долдугаар сарын 17-нд Керчийн гүүрийг мөн далайн нисгэгчгүй онгоцоор дайрчээ. Энэ үеэр гүүр эвдэрч, хоёр хүн амиа алдсан байна.
Керчийн гүүрэн дээрх анхны дэлбэрэлт 2022 оны 10-р сарын 8-нд болсон бөгөөд чиргүүлтэй ачааны машин дэлбэрсний улмаас автозамын гүүр зарим хэсгээрээ нурж, төмөр замын гүүр мөн ихээхэн эвдэрсэн юм.
Киев эдгээр халдлагын хариуцлагыг шууд хүлээгээгүй ч 8-р сарын эхээр Украины Үндэсний аюулгүй байдал, батлан хамгаалах зөвлөлийн нарийн бичгийн дарга Алексей Данилов 2023 оны долдугаар сар, өнгөрсөн оны аравдугаар сард Керчийн гүүрэн дээр болсон халдлагад Украины тусгай албад оролцсон гэдгийг баталсан юм.
Эх сурвалж: ВВС news
