ОХУ-ын Ерөнхийлөгч Владимир Путин ирэх есдүгээр сарын 9-10-нд Энэтхэгийн нийслэл Шинэ Дели хотноо болох “Их 20”-ийн дээд хэмжээний уулзалтад өөрийн биеэр оролцохыг үгүйсгэхгүй гэж Кремль дэх эх сурвалж мэдээллээ. Хэрэв энэ айлчлал болвол 2022 онд Оросууд Украин руу цөмрөн орсноос хойш Путины барууны удирдагчидтай хийх анхны уулзалт болно.
Эх сурвалжийн хэлснээр, Оросын удирдагч Украины дайны улмаас харьцангуй тусгаарлагдсан хэсэг хугацааны дараа дэлхий дахинд нэр хүндээ олж авахыг эрмэлзэж байна. Путин БНХАУ-ын дарга Ши Жиньпиний нэгэн адил барууны холбоотнуудын тойрогт хамааралгүй орнуудын анхаарлыг татахыг хүсч байна.
2014 онд Крымийг өөртөө нэгтгэсний дараа Барууны G-20-ын гишүүн орнуудын удирдагчид Австралид болсон G20-ийн дээд хэмжээний уулзалтын үеэр Путиныг үл тоомсорлож байв. 2020, 2021 оны тахлын үеэр тэрээр G20-ийн уулзалтад видео холбоосоор оролцсон. ОХУ-ын ерөнхийлөгч 2022 онд Индонезийн Бали аралд болох арга хэмжээнд оролцоогүй бөгөөд энэ уулзалтаар бусад орны удирдагчид Оросын түрэмгийллийг буруушаасан юм.
Долдугаар сарын сүүлчээр Шинэ Дели рүү аялах боломжийн талаарх асуултад Путин хариулахдаа энэ талаар хараахан бодоогүй гэдгээ дурдаж байв.
Өнгөрсөн долдугаар сард “Их 20”-ийн Сангийн сайд нарын хоёр өдөр үргэлжилсэн уулзалт Украины асуудлаар санал зөрөлдсөний улмаас уламжлалт хамтарсан мэдэгдэл хийлгүй өндөрлөсөн юм. Энэтхэгийн Сангийн сайд Нирмала Ситараман хэлэхдээ, Орос, Хятад хоёр улс уг баримт бичигт дурдагдсан "дайн" болон "хүмүүсийн асар их зовлон шаналал" гэсэн үгийг эсэргүүцснээс энэ мэдэгдэл хийгдээгүй хэмээжээ.
Путин ОХУ-ын хилээс гарсан тохиолдолд түүнд тулгарч буй нэмэлт хүндрэл бол Украины хүүхдүүдийг Орост албадан гаргахтай холбогдуулан дайны гэмт хэрэгт сэжиглэн Олон улсын эрүүгийн шүүхээс баривчлах шийдвэр гаргасан явдал юм. Яг ийм учир шалтгааны улмаас Оросын ерөнхийлөгч Йоханнесбургт болсон БРИКС-ийн дээд хэмжээний уулзалтыг өнжсөн бөгөөд зохион байгуулагч орон болох Өмнөд Африк түүнийг баривчлахаас өөр аргагүй байдалд хүрэх байв. Учир нь Өмнөд Африк бол Ромын дүрмийг соёрхон баталсан 123 орны нэг бөгөөд ОУЭШ-ийн шийдвэрийг дагаж мөрдөх үүрэгтэй. Харин Энэтхэг, Орос, АНУ-ын хамт уг баримт бичгийг батлаагүй байна.
Эх сурвалж: Мoscowtimes.ru
