Өнөөдрийн байдлаар Хөвсгөлийн уулсаас Дэлгэрмөрөн, Үүр, Хангай нурууны өврийн Цагаантуруут голуудын усны түвшин өмнөх өдрийнхөөс 10-45 см нэмэгджээ. Түүнчлэн Сэлэнгэ, Орхон, Хараа гол, Бэлтэс, Үүр гол, Халх, Онон, Хэрлэн гол орчимд үерийн түвшнийг 10-100 см даваад байна. Мөн Сэлбэ гол /Санзай, Дамбадаржаа/ орчимд үерийн түвшнийг давжээ. Харин Балж гол, Хүдэр гол /Хүдэр сум/ орчимд үерийн аюултай түвшин 5-15 см даван үерлэж байна.
Маргааш буюу наймдугаар сарын 12-нд баруун аймгуудын нутгийн баруун болон хойд, төвийн аймгуудын нутгийн баруун хойд, зүүн аймгуудын нутгийн зүүн хэсгээр бороо, дуу цахилгаантай аадар бороо орно. Иймд гол мөрний сав дагуу суурьшиж, нутаглаж буй малчид, тариаланчид , аж ахуйн нэгж байгууллага, ард иргэдийг үерийн аюулаас сонор сэрэмжтэй байхыг анхаарууллаа.
