Украин дахь Оросын цэргийн тусгай ажиллагаа 530 хоног тасрахгүй үргэлжилж, 18 дaхь сар руугаа орж байгаатай холбогдуулан мэдээллийн тэнцвэртэй байдал хангах үүднээс украины Freeдом ТВ, оросын зарим ТВ, Youtube сайт, украины цэргийн эксперт Михаил Притула, дээд тушаалын офицер Сергей Череватый, украины политтехнолог Тарас Загородний нарын ярьснаас түүвэрлэн орчуулж сонирхуулъя. Энд sonin.mn сайтын байр суурь тусгагдаагүй болно. Орос тун хүнд өдрүүдийг өнгөрөөж байна. Москва хотын төвд агаарын дайралт тасралтгүй хийгдэж оршин суугчид нь нойргүй хонож байсан 1941 оны намар, өвлийг санагдуулам үйл явдал түүхэндээ ийнхүү өрнөж байсангүй. Одоо бол хэвийн үзэгдэл болжээ. Оросын суртал нэвтрүүлэг тасралтгүй ажиллана. Ам хэлээрээ Украин ба НАТО, АНУ-ыг хараан зүхнэ. Хараал зүхэл нь ялалт авчирдаг бол мянгантаа ялчих байлаа. Оросын суртал нэвтрүүлэгчид харин фронтын байдлыг илэн далангүй ярьж болохгүй, Крым руу Украины арми цохилт өгч байгааг дурсаж болохгүй, Крымын хоёр гүүрээр оросын цэрэг зэвсэг тээвэрлэж болохгүй болсон тухай ганц ч үг ганхийж болохгүй, Херсон муж, Крым хоёр таслагдсаныг ярьж болохгүй гэсэн хатуу үүрэг Кремлиэс өгчээ. Тэгсний оронд Украины зэвсэгт хүчний сөрөг давшилт баларлаа, дампуурлаа, Украины хохирол их байна, НАТО-гийн төчнөөн техникийг устгалаа гэсэн хэдэн тоо зохиож давтан ярих нь чухал ажээ. Оросын нэг ТВ-ээр ярьсан сэдэв: Украинд дрон байхгүй, дронтой тэмцдэг хэрэгсэл байхгүй, миномет байхгүй, GPS байхгүй, сөрөг давшилт нь окопны дайн болж хувирсан! Кремлийн суртал нэвтрүүлэгчид, ТВ-ийн ток-шоунд оролцогчдын нүдний гал үхсэн, царай пад харласан, цөхөрч гуньсан харагдана. Гэвч устгана, ална, сөнөөнө гэдгээ үе үе хилэнтэй хашгачих ба Хойд Солонгост С.Шойгуй айлчилж, Америкийн империализмыг ялсан 70 жилийн ойн баяр ёслол, цэргийн сүрлэг парадад оролцсон нь оросуудын сэтгэлд ямар нэгэн ялалтын цог уугиулж өгсөн бололтой. Орос хэл рүү хөрвүүлэн тэр дор нь ТВ ба сайтуудаараа үзүүлэв. Гэвч баярт оролцож буй Шойгугийн нүд гуниг тээж царай зүс барайж сааралтаад нэг л биш ээ. Хойд Солонгосыг тийм их зэвсэгтэй, цэрэгтэй гэдэгт атаархаж байгаа бололтой. Болж өгвөл бүгдийг нь хамаж аваад Украины фронт руу илгээчих юмсан!
Собчакийн бэлбэсэн гэргий депутат энэ авгай тун ноцтой асуулт тавьсныг оросын зарим сайт нөхөж үзүүлэв. Жинхэнэ арми маань хаачсан хэрэг вэ? 70 % цоо шинээр зэвсэглэсэн гээгүй бил үү? Тэр хаачсан бэ? Хаачсан бэ? Хаачсан бэ? Яагаад алга болчив? “60 минут”-аараа Ольга Скабеева бүр ч ноцтой баримт дэлгэв. Алагдсан орос цэргийн 284 мянган гашуудлын мэдээ, дээр нь сураггүй алга болсон гэж нэмэгдээд намайг айлгаж, шооконд орууллаа гэв. Орост дайны төгсгөлийн тухай дээр доргүй, элитийн хүрээнд элдэв хувилбараар ярьж байна. Путинээс бусад нь ялах итгэлээ бүрмөсөн гээсэн, харин Орос орноо аюул осолгүй хэрхэн авч гарах вэ гэдэгт тархиа гашилгана. Сүйхээтэй нэг нь Москваг орхин явж байна. Маш хурдан капитуляц болж, хоёр яс салъя гэсэн хувилбар ч явж байгаа сурагтай. Кремльд төрийн эргэлт тохиож, халаа сэлгээ хийгдвэл Путины орыг Абрамович, Ходорковский нар авч болох тухай цуурхал тархжээ. Сталиныг 1953 онд үхэхэд тушаалыг нь Маленков, Хрущев хоёр хуваан авч байсан шиг юм болох нээ? Сергей Череватыйн ярианд Украины арми туршлага хуримтлуулж, Оросыг ялах бүх арга тактикаа нягт нямбай боловсруулж байгаа тухай дурджээ. Бахмутад оросууд зууралдан байлдсаар, гэхдээ окопны байлдаандаа сульдаж, байрлалаа алхам алхмаар алдсаар байна. Зеленский тэргүүн шугамд очиж цэргүүдтэйгээ уулзаж байна, оросын талаас удирдагч байтугай генерал ч үзэгдэхгүй. Үзэгдвэл окопондоо хаймарсдуулаад, тэнэсэн суманд амиа алдчихдаг. Иймд фронтын галын шугам руу зүглэхээс бүгд айна. Яг өнөөдрийн байдлаар оросууд Купянск, Бахмут, Авдеев, Марьинск, Запорожийн чиглэлд амжилтгүй давшин хүн хүчнээ гарздана. Украины цэрэг эх орныхоо Мелитополь, Бердянскийн чиглэлд амжилттай аажуу давшина. Алагдсан орос цэргийн тоо албан ёсоор 250 мянгыг давчихлаа. Амжилтгүй байлдаж байгаадаа хорссон Оросын командлал Украины дурын хотын орон сууцны хороолол, эмнэлэг, сургууль, цэцэрлэг ясли, хаа дуртай зүг рүүгээ пуужиндаж пуужингийн терророор айлгах гээд нэмэргүй, гэхдээ харамсалтай, ийм л зураглал харагдана. Украины дайны үнэн мөн чанар ийм болжээ. Тарас Загородний ярьж байна. Орост Путины пропагандад яагаад итгэдэг вэ? Оросын элитийн зарим нь бол дайнд ялагдлаа гэдгээ аль дээр үеэс, бүр СВО (цэргийн тусгай ажиллагаа) эхлүүлээд 7 хоногийн дараа мэдэрсэн, ойлгосон. Харин ард түмнээ нэг хэсэгтээ хуурч аргацааж байхгүй бол болохгүй. Гэвч Москвад агаарын дайралт олон хийгээд эхэлбэл украиныг үзэн ядах гэхээсээ ийм байдалд хүргэсэн оросын эрх баригчдаа хараагаад эхэлнэ, өөр эвгүй элдэв сэдэв босч ирнэ. Одоо бол БХЯ, сайд Шойгу болон оросын армийн болхи, хоцрогдсоныг яриад шүүмжлээд эхэлжээ. Ялангуяа нөгөө гайхуулаад байдаг агаарын довтолгооны эсрэг олон зенитийн пуужингууд, “Панцирь”-ууд хаана байна вэ гэсэн асуулт оросуудын амнаас цухалзана.
Оросын армид цэргийг нэг удаагийн зарлагын материал болгон ашигладаг, ганц удаагийн жижигхэн ялалтыг сүр дуулиан болгодог, тэгснээрээ өөр газар ялагдаж ухарч байгаагаа цайруулдаг, түүгээрээ Украины армиас ялгардаг тухай цэргийн эксперт хурандаа Михаил Притула ярьжээ. Махан таташ руу үй олноор нь илгээх, зөрүүлээд дайчилгаагаар төдий тооны эрчүүдийг татан авчрах ердөө л конвейр шиг. Гэтэл Крымд цэрэг татлага явагддаггүй, тэр их сонин. Олноор нь татвал зарим нь хаяад алга болно, нөгөө талд орчихно, фронтод явсан эрчүүдийг нөхөх эрс ОХУ-аас очихгүй, ер нь Крымээ алдаж таарах тул тийшээ зүглэх, суурьших орос иргэд бараг үгүй болсон гэнэ. Крым ч дүүрчээ. Тэнгисийн дроноор Украин нь гүйцэгдэхээсээ өнгөрлөө. ОХУ-ын Новороссийск дэх тэнгисийн цэргийн бааз руу украины тэнгисийн дрон халдаад десантын “Оленегорский горняк” гэх том хөлөг онгоцыг дайнд оруулах аргагүйгээр гэмтээв. Керчийн хоолойд SIG гэх шатахууны танкер руу нь халдав. Одоо дрон тасралтгүй илгээгээд байх болно. Дайн ОХУ-ын нутаг дэвсгэрт зүй тогтлоороо логикоороо шилжээд орсон юм биш үү? Украиныг Азовын тэнгисгүй болгочихлоо гээд хөөрцөглөөд байсан оросууд одоо Новороссийск, Сочидоо цохилт амсана. Оросын зэвсэг техникийн үйлдвэрлэл хэр явагдаж байгааг энэ дайн бүдгэрүүлсэн. Украин, АНУ, Канад, Швейцарь, Австрали, Япон, мөн Европын Холбооноос “Радуга” хэмээх зохион бүтээх товчоонд маш том хориг тавьжээ. Энэ товчоо янз бүрийн төрлийн пуужин зохион бүтээдэг, өндөр технологиороо Оростоо тэргүүлдэг. Цэргийн аж үйлдвэрт хэрэглэдэг элдэв эд анги, тоног, төхөөрөмж Оросын хил давж нууцаар орж ирсээр байгааг олон улсын санкц зогсоож чадаагүй. Түрэмгийлэгч улсын гаалийн статистик тас нууцлагдсан. Пуужингийн электроник нь Хятад, Хонконг, Туркээс Орос руу нууцаар орж ирсээр. Одоо Х-101 гэх стратегийн далавчит пуужингаа зогсоочилгүй үйлдвэрлэж байх шиг. Гэвч Оросын пуужингийн нөөц илэрхий дундарсан гэх дүнтэй байна. Ер нь Орос нь пуужин үйлдвэрлэх технологи, эд ангийн хувьд Баруун ба Хятадаас үлэмж хамааралтай байжээ. Гэтэл одоо нөөцөө шавхан байлдаж байна. Анхны тооцоогоор пуужингийн нөөц рүү орохгүйгээр гуравхан хоногт Киевийг, 7 хоногт нийт Украиныг устгаад буулгаад авчих байсан ба одоо пуужингийн өлсгөлөн нүүрлээд ирмэгц хэнээс ч, ямар ч үнээр болов пуужин авч нөөцлөх, дайндаа хэрэглэхийг чухалчилна. Шойгу Хойд Солонгост баярт оролцох гэж уригдсан бус пуужингийн эрэлд гарч зорьж очсон болж таарав. Дайны өнөөгийн байдал хурцдах үе рүүгээ орж байж магадгүй байна. Орос нь нэгэн зэрэг 500 дрон, нисэгчгүй онгоцоор агаараас гэнэт цохилт өгөх хувилбар боловсруулсан мэдээ байна. Нэгэн зэрэг Украины тэнгэрийг 500 шахед ба дроноор бүрхэх нь байна. Энэ бол эцсийн нөөцөө шавхан азаа үзэх сүүлчийн тулалдаан байж болох юм. Хэрэв тэрхүү 500-гийн талаас илүүг Украины агаараас эсэргүүцэх зэвсгээр устгачихвал оросын хувьд цаана нь зэвсэг техникээ шавхаад шавхаад ялагдахгүй байх нөхцлөө хангаж чадахгүй гэж цэргийн мэргэжилтнүүд үзэж байна. Украины цэрэг өдөр тутам, цаг тутам туршлагажиж байна. АНУ ба Баруунаас авсан зэвсгээ Оросын нутагт оросыг цохиход хэрэглэхгүй гэсэн болзлоо мөрдөж америк HIMARS-аас дутахгүй “украин HIMARS”-аа (“Ольха”, “Богдана”, “Нептун” гэх мэт) бүтээж зэвсэглэлдээ нэвтрүүлж дайнд орууллаа. Бүр “нисдэг HIMARS” гэдгийг бүтээчихлээ. Энэ нь ираны нисдэг шувуухайгаас хамаагүй илүү хүч чадалтай, Оросын зэвсэглэлд төстэй зэвсэг байхгүй ажээ. Орост цэрэг татлага явуулахаар сүрдүүлэхийн сацуу хоёр ч мужид иргэдэд зэвсэг тарааж эхэлжээ. Курск, Белгород мужид зэвсэглэсэн тероборона, сайн дурын ардын эргүүлүүд ажиллах Кремлийн төлөвлөгөө хэрэгжинэ. Гэтэл. Гэтэл ганцхан өдөрт Орост цэрэг татлагын 29 комиссариатыг галдан шатаасан нь юуг илтгэнэ вэ? Оросын ард түмэн СВО-г дэмжиж байгаа нь энэ үү? Орос, англи хэлнээс түүвэрлэн хөрвүүлсэн Дүгэржавын Номиндарь
