Баянзүрх дүүргийн зургаадугаар хороо, 25 дугаар байранд зөвшөөрөлгүй өргөтгөл нэмж барьж буй иргэн шаардлага тавьсан хорооны засаг дарга, ажилтан руу зүй бусаар аашилж буй бичлэг нийтлэгдсэн.
Тодруулахад, тухайн иргэн тус байранд эм ханган нийлүүлэх үйлчилгээ явуулж буй өргөтгөлийг 2015 онд барьсан байна. Харин одоо үүнтэйгээ залгуулж дахин өргөтгөл барихаар ажлаа эхлүүлсэн нь энэ бөгөөд CU оруулна гэж ярьдаг талаар оршин суугчид хэлж байгаа юм.
Энэ талаар Баянзүрх дүүргийн Засаг даргын тамгын газраас тодруулахад "Тухайн иргэний өргөтгөл барих талбай ямар ч зөвшөөрөлгүй. Зөвшөөрөлгүй болохыг нь Egazar.gov.mn сайтаас харах боломжтой. Цаашид хийх гэж буй өргөтгөлийн ажил ямар ч зөвшөөрөлгүй байгааг харж болно. Тиймээс дүүрэг, нийслэлээс зөвшөөрөл олгосон гэж бухимдаж байгаа иргэдэд зөв мэдээлэл өгөх хэрэгтэй. Иргэний маргаан үүсгэж буй газарт аль ч шатнаас ямар ч зөвшөөрөл олгоогүй.
Өргөтгөл барьж байгаа иргэн хуучин бичиг баримттай ирж маргаан үүсгэж байгаа учир холбогдох газарт албаныхан болон иргэд гомдол гаргасан" гэлээ.
Хэрвээ энэ өргөтгөл баригдвал явган зорчигч автозамаар зорчихоос өөр аргагүй байдалд хүрэх юм байна.
