Ардын уран зохиолч, Төрийн шагналт, Соёлын гавъяат зүтгэлтэн Б.Лхагвасүрэн агсны "Тамгагүй төр" эмгэнэлт түүхэн жүжиг анх 1998 онд Улсын драмын эрдмийн театрын тайзнаа тавигдсанаас хойш 24 жилийн дараа физикл хэлбэрээр ахин амилаад байгаа юм.
Монголын үндэсний сонгодог эл бүтээлийг төр, хувийн хэвшлийн хамтын ажиллагааны хүрээнд Соёлын яам, Үндэсний урлагийн их театр, Улсын драмын эрдмийн театр, “Hero” энтертайнмент, “Хувьсал” продакшн хамтран бүтээсэн бөгөөд дэлхийн театрын чиг хандлагад нийцсэн орчин үеийн тайзны технологийг ашигласны зэрэгцээ нэг жүжгийг театрын урлагийн хэд хэдэн төрлөөр үзэх боломжийг олгож байгаагаараа онцлог.
Үзэгчдийн сайшаал, магтаал бишрэлийг хүлээгээд байгаа уг уран бүтээл Монголын уран зохиол, монголын сонгодог урлаг ямар өндөр төвшинд хүрч буйг илтгэх нэгэн томоохон жишээ болоод буй. Тэгвэл Соёлын сайд Ч.Номин "Тамгагүй төр" физикл драмын жүжгийн уран бүтээлчидтэй уулзаж, жүжгийг олон улсад гаргахаар судалж байгаа талаар өчигдөр мэдээлэл өгсөн. Гэвч цахим сүлжээ болон хэвлэл мэдээллийн хэрэгслээр улс төрийн нөлөө орсон талаарх сэтгэгдэл хөврөөд буй.
Угтаа Монголын сонгодог урлагийн нэгэн томоохон төлөөлөл болсон уг уран бүтээл Олон улсын тайзнаа тавигдахад улс төрийн нөлөө тийм ч хамааралтай биш. Монголчуудын нэг нийтлэг зан нь ямар ч зүйлийг улс төржүүлэх гэж хичээдэг, улс төрийн хамааралтай болгох явдал.
"Тамгагүй төр"-ийг ахин амилуулахад "Hero" интертайментийн захирал, найруулагч СТА Б.Баатар ажиллаж байгаа бол Ерөнхий продюсероор М.Есөнмөнх, гүйцэтгэх продюсероор А.Амундра ажилж байгаа. Найруулагч Б.Баатарын хувьд Монгол Улсын Ерөнхий сайд Л.Оюун-Эрдэнийн ах бол гүйцэтгэх продюсер Д.Амундра нь МАН-ын гишүүн аж. Иймд уг бүтээлийг дэлхийн тайзнаа гаргахад улс төрийн нөлөө орж байна гэх ойлголт төрөөд буй.
Гэвч үнэн хэрэгтээ Монголын сонгодог урлагийн тайзанд шинэ хуудас нэмэн гарч ирж буй "Тамгагүй төр" физикл драм олон улсын сонгодог урлагийн тайзнаа өнгө нэмэн гялалзаж байвал Монголчууд бидний бас нэг бахархах үйл явдал болно гэдэгт итгэлтэй байна. Аливааг улс төржүүлэхийнхээ өмнө гарч болох эерэг үр дагаварыг урьдчилан хардаг болцгооё.
